Праз 5 дзён пачнецца вылучэньне кандыдатаў у дэпутаты

09.02.2010 — Новости Политики |

Размер текста:: A; A; A

Источник материала:

Усе 367 акруговых камісіяў для прызначаных на 25 красавіка выбараў дэпутатаў мясцовых Саветаў цалкам сфармаваныя.

Пра гэта “Свабодзе” сёньня паведаміў сакратар Цэнтральнай выбарчай камісіі Мікалай Лазавік.

Паводле ягоных дадзеных, у акруговых камісіях партыйцы складаюць 6,7% ад усіх сябраў. Гэта больш, чым іх прадстаўніцтва ў тэрытарыяльных камісіях, дзе на долю ўсіх партый прыпадае толькі 1,1% месцаў.

На маё пытаньне: “Якія партыі маюць у камісіях найбольшае прадсташніцтва?” спадар Лазавік адказаў так:

“Сярод партыйных актывістаў найбольшую колькасьць складаюць КПБ — 175 чалавек, і “Справядлівы сьвет” — 48. Даволі актыўна дзейнічаюць Аграрная партыя —19, Лібэральна-дэмакратычная і партыя БНФ — па 16, АГП —14. Ёсьць прадстаўнікі Грамады, як адной, так і другой. Ад “Згоды” — 5 чалавек.

У цэлым пры фармаваньні акруговых камісіяў актыўнасьць партыяў значна павысілася”.

Аб’яднаная грамадзянская партыя правяла ў акруговыя камісіі 14 чалавек. Старшыня партыі Анатоль Лябедзька ўдакладняе: у камісіі трапіў толькі кожны чацьверты вылучэнец:

“Але мы не падавалі вялікую колькасьць прэтэндэнтаў, мы падавалі тэставую колькасьць. А гэта азначае, што ўлада зноў праігнаравала людзей, якія па ўсіх парамэтрах прыдатныя да працы ў акруговых выбарчых камісіях. Я не магу зразумець матывацыі, чаму, напрыклад, Аляксандар Сасноў, які мае досьвед працы і ў парлямэнце, і ва ўрадзе, ня можа быць сябрам акруговай камісіі. Тое ж самае можна сказаць пра Аляксандра Дабравольскага, Валянціну Палевікову і многіх-многіх іншых. Таму, калі казаць пра якасны складнік, то тут ніякага адметнага прагрэсу я ня бачу”.

Мікалай Лазавік кажа: пасьля фармаваньня акруговых камісіяў паралельна пачынаюцца дзьве кампаніі:

“З 14 лютага пачынаецца вылучэньне кандыдатаў у дэпутаты. Гэта азначае, што з гэтага дня можна праводзіць сходы працоўных калектываў, паседжаньні кіраўнічых партыйных органаў, а таксам зьбіраць подпісы ў падтрымку патэнцыйных кандыдатаў. Але тым, хто зьбірае подпісы, трэба спачатку зарэгістраваць ініцыятыўныя групы.

Паралельна будзе ісьці стварэньне ўчасткаў для галасаваньня. А калі іх вызначаць, то пачнецца і стварэньне ўчастковых выбарчых камісіяў. Гэтая працэдура завершыцца не пазьней за 10 сакавіка”.