У фірме "Дзіксэнд" пра крымінальную справу ня ведаюць

Источник материала:

Падставай для затрыманьня актывістаў грамадзянскай кампаніі "Гавары праўду!" стала крымінальная справа, пачатая адносна кіраўніцтва выдавецкай фірмы "Дзіксэнд". Гэта вынікае з паведамленьня, якое зьявілася на сайце Міністэрства ўнутраных спраў Беларусі.У ім гаворыцца, што 17 траўня Ленінскі РУУС Менску пачаў крымінальную справу адносна кіраўніцтва выдавецкай фірмы ТАА "Дзіксэнд" па артыкуле "Распаўсюд ілжывай інфармацыі аб таварах і паслугах".
Падставай для пачатку крымінальнай справы сталі вынікі праверкі заявы ад уладальнікаў таварыства з абмежаванай адказнасьцю аб незаконным выкарыстаньні гандлёвай назвы, юрыдычнага адрасу і іншых дадзеных іхнай фірмы на друкаванай прадукцыі ТАА "Дзіксэнд". Заява паступіла 29 красавіка гэтага года. 
Падчас апэратыўна-сьледчых дзеяньняў было ўстаноўлена, што гэтая друкаваная прадукцыя выраблялася на замову кіраўнікоў руху "Наперад" і грамадзянскай кампаніі "Гавары праўду" Уладзімера Някляева і Сяргея Вазьняка.
Дырэктар ААТ "Дзіксэнд" Аляксандр Болдыраў распавёў Свабодзе, што ня ведае ні пра якую крымінальную справу: 
"Ніякай крымінальнай справы няма, я так думаю. Калі штосьці і ёсьць, то гаспадарчае. Калі будзе – і ці будзе – гаспадарчы суд, тады і разьбярэмся, ёсьць там справа ці не. Так, была праверка, але вынікі пакуль невядомыя". 
Ці друкаваліся паштоўкі кампаніі "Гавары праўду" у "Дзіксэндзе", спадар Болдыраў адказваць адмовіўся.