Аляксандр ЛУКАШЭНКА: "Ніякай дэвальвацыі мы не плануем"

Источник материала:

ААТ "БАТЭ" ў 2015 годзе плануе ў 2 разы павялічыць аб'ём вытворчасці. Аб гэтым далажыў Прэзідэнту Беларусі Аляксандру Лукашэнку, які наведаў гэтае прадпрыемства, гендырэктар Анатоль Капскі, паведамляе БЕЛТА.

У студзені—кастрычніку гэтага года Барысаўскі завод аўтатрактарнага электраабсталявання вырабіў прадукцыі на суму Br172,3 млрд. Паводле вынікаў года гэты паказчык чакаецца на ўзроўні Br238,4 млрд.

Прэзідэнт азнаёміўся з арганізацыяй вытворчасці на заводзе, наведаў адзін з цэхаў, дзе яму было даложана аб выніках рэканструкцыі і тэхнічнага пераўзбраення прадпрыемства, аб укараненні сучасных тэхналогій. Дырэктар ААТ "БАТЭ" праінфармаваў Аляксандра Лукашэнку аб планах па выпуску новай прадукцыі і прадэманстраваў некаторыя ўзоры. Гаворачы аб павелічэнні вытворчасці запатрабаванай прадукцыі (генератараў), Аляксандр Лукашэнка таксама адзначыў, што "трэба займаць рынкі і рабіць гэта ўжо сёння". Вядома, трэба вырабляць і новую прадукцыю, дадаў кіраўнік дзяржавы. "Мы гатовыя падтрымаць прадпрыемства, але аддача павінна быць адпаведнай".

Пасля наведвання прадпрыемства, Аляксандр Лукашэнка традыцыйна пагутарыў з яго работнікамі і мясцовымі жыхарамі. "Ніякай дэвальвацыі мы не плануем", — падкрэсліў кіраўнік дзяржавы. Ён дадаў, што "на апошнім дакладзе старшыні Праўлення Нацбанка даручыў аб'явіць далейшы курс рубля". "Хто ўзняў гэта пытанне? Яго ўзнялі "шарлатаны", для якіх, чым горш краіне, тым лепш для іх. Ні пра якую дэвальвацыю размовы не можа быць. Мы калідор гэты вам аб'явім", — сказаў Аляксандр Лукашэнка. "Але хачу вас папярэдзіць. Вы бачыце, што адбываецца з доларам. Сёння завяршылася пасяджэнне "Вялікай дваццаткі", дзе асноўныя спрэчкі выклікала пытанне аб валютных войнах, — адзначыў кіраўнік дзяржавы. — Амерыканцы вырашылі падтрымаць сваю эканоміку і ўкідваюць у яе $600 млрд як мінімум. У такіх выпадках звычайна адбываецца дэвальвацыя валюты. Таму будзьце асцярожныя з гэтым доларам. Я вас папярэдзіў". Аляксандр Лукашэнка таксама заўважыў, што ад таго, што некаторыя грамадзяне апошнім часам пачалі актыўна скупляць валюту, дзяржава нічога не губляе, бо гэтыя грамадзяне ўсё роўна нясуць набытую валюту ў банкі. Прэзідэнт падкрэсліў, што стабільнасць нацыянальнай валюты пацвярджаецца і растучым аб'ёмам золатавалютных рэзерваў. Паводле слоў кіраўніка дзяржавы, у бліжэйшы час "мы адкрыем засекі і пакажам золата, якое накапілі". Аляксандр Лукашэнка адзначыў, што эканомікі ўсяго свету выходзяць з крызісу, але беларуская эканоміка менш пацярпела, таму мы хутка можам выйсці з яго.

У Беларусі будзе прадоўжана падтрымка і развіццё сістэмы прафтэхадукацыі, заявіў Аляксандр Лукашэнка, звяртаючыся да жыхароў Барысава. Прэзідэнт лічыць вельмі вялікім дасягненнем, што ў Беларусі захавалі сістэму прафесійна-тэхнічнай адукацыі. "Сёння самая вялікая праблема — няма каму працаваць, няма спецыялістаў. Таму тое, што мы гэта захавалі, — вельмі вялікае наша дасягненне", — сказаў ён. Паводле слоў кіраўніка дзяржавы, да яго звяртаюцца яго калегі з постсавецкіх дзяржаў з просьбай падрыхтаваць людзей па рабочых спецыяльнасцях, паколькі ў іх сістэма ПТВ развалілася. Аляксандр Лукашэнка адзначыў, што ў Беларусі вялікі попыт на спецыялістаў рабочых прафесій, і яны ў краіне будуць патрэбны заўсёды. У якасці прыкладу ён прывёў ААТ "БАТЭ", якое наведваў, і адзначыў, што працуючых тут спецыялістаў замяніць не так проста, чалавек "з вуліцы" на такім абсталяванні працаваць не зможа. Прэзідэнт успомніў, што ў свой час, калі ставілася пытанне аб тым, што не варта павялічваць колькасць студэнтаў ВНУ, ён на такое рашэнне не пайшоў. "І сёння не шкадую. Гэта справа кожнага чалавека: атрымаўшы адукацыю, як ёю распарадзіцца".

Футбольны стадыён у Барысаве плануецца пабудаваць да канца 2012 года. Аб гэтым было даложана Прэзідэнту Беларусі ў час наведвання ім месца будаўніцтва стадыёна.

Неабходнасць будаўніцтва новага стадыёна ўзнікла ў сувязі з тым, што футбольны клуб БАТЭ, створаны на базе Барысаўскага завода аўтатрактарнага электраабсталявання, стаў паспяхова выступаць на сусветным узроўні. БАТЭ стаў першым беларускім клубам, які згуляў у групавым турніры Лігі чэмпіёнаў. У 2009 годзе барысаўскі клуб прабіўся ў групавы турнір Лігі Еўропы. Не горш каманда выступае і ў гэтым сезоне. Аднак усе дамашнія матчы асноўны склад БАТЭ праводзіць на Барысаўскім гарадскім стадыёне, дзе немагчыма прымаць матчы групавых турніраў Лігі чэмпіёнаў і Лігі Еўропы. Эскізны праект новага стадыёна распрацавала славенская фірма. Яго ўмяшчальнасць складзе каля 13 тыс. чалавек. Ацэньваецца будаўніцтва новага спартыўнага аб'екта ў 20 млн. еўра. Як расказаў кіраўніку дзяржавы прадстаўнік славенскай фірмы, архітэктурная канцэпцыя стадыёна ўнікальная: іншага такога няма не толькі ў Еўропе, але і ў свеце. Тут будзе выкарыстана натуральнае пакрыццё з падагрэвам. Паводле слоў спецыялістаў, "каб гуляць у еўрапейскі футбол, неабходна натуральнае поле".

Прэзідэнт Беларусі разам з галоўным трэнерам каманды Віктарам Ганчарэнкам, футбалістамі Дзмітрыем Ліхтаровічам і Аляксандрам Юрэвічам, а таксама навучэнцам Аляксандрам Паўлаўцом заклаў капсулы з пасланнем будучым пакаленням у фундамент будучай футбольнай арэны.

Теги: Курсы валют