Тэзісы перадвыбарнай праграмы кандыдата ў прэзідэнты Віктара Цярэшчанкі

Источник материала:

Перадвыбарная праграма кандыдата ў прэзідэнты Віктара Цярэшчанкі апублікавана 3 снежня ў рэспубліканскіх газетах, у прыватнасці ў «Советской Белоруссии».

«Дзеля таго, каб надзеі кожнага на лепшае жыццё, добры дом, моцную сям’ю, дабрабыт дзяцей сталі рэальнасцю, я гадамі распрацоўваў гэтую праграму, вывучаў айчынны і сусветны вопыт», — заяўляе Цярэшчанка.

За 16 гадоў з часу абрання прэзідэнта цэны на прадукты з улікам грашовых дэнамінацый узраслі ў тысячы разоў. Зарплаты, пенсіі, стыпендыі, дапамогі адстаюць ад росту цэн. І кожны разумее, што пасля выбараў рост цэн пойдзе яшчэ хутчэй, сцвярджае Цярэшчанка. На яго думку, гэта вынік памылак у грашова-крэдытнай палітыцы краіны.

«Грубая памылка і ў падатковай сістэме.

Ва ўрадзе не разумеюць, што галоўны прынцып падатковай сістэмы канкурэнтаў — спачатку не перашкаджаць вытворцы выпусціць і прадаць прадукцыю,

а ўжо потым — узяць падаткі з прыбытку. У Беларусі падаткі ўключаюць у цану прадукцыі як затраты і надбаўкі да іх», — заяўляе Цярэшчанка.

Як гаворыцца ў праграме, сёння ўлада бачыць ратаванне ў прыцягненні замежнага капіталу. «Гэта стратэгія адсталых дзяржаў, навязаная міжнародным капіталам, які размяшчае экалагічна небяспечныя вытворчасці на чужых тэрыторыях. На такіх тэрыторыях народу адводзіцца роля толькі рабсілы і канкурэнта мігрантам у краіну. Калі Беларусь пойдзе па гэтым шляху, мы атрымаем міжрэлігійныя і этнічныя праблемы, якія зараз трасуць краіны Еўропы, ЗША і ўвесь свет», — заяўляе Цярэшчанка.

Ён прапаноўвае забяспечыць незалежнасць краіны ад замежнай валюты. «Забяспечым нашы грошы нацыянальным набыткам. Увядзем рубель свабодна канверсоўным з пачатковым курсам 3 рублі за 1 долар. Адначасова з гэтым усе эканамічна абгрунтаваныя праекты нацыянальных прадпрыемстваў атрымаюць права на дзяржаўныя інвестыцыі за кошт продажу сваіх акцый дзяржаве. Акцыі прадпрыемстваў (а не віртуальная валюта замежных дзяржаў і не золата, якое амярцвляе) будуць забеспячэннем нацыянальных грошай. Акцыі эфектыўных прадпрыемстваў — гэта актывы, лепшыя за золата!» — мяркуе Цярэшчанка.

«Кіраваць прадпрыемствамі ў краіне будзе не прэзідэнт, а кампетэнтныя спецыялісты і дырэктары прадпрыемстваў, падкантрольныя сваім упраўленням, працоўным калектывам і заканадаўству.

Акцыі будуць прадавацца работнікам, банкам, грамадзянам, а таксама іншаземцам, але за нашу валюту», — заяўляе кандыдат.

За кошт эканамічнага росту Цярэшчанка абяцае забяспечыць вырашэнне задач у сацыяльнай сферы. «Дадаткова павысім выплаты адзінокім маці, шматдзетным, малазабяспечаным, інвалідам. Палепшым сістэму адрасных датацый сем’ям з нізкімі даходамі. Для моладзі — бясплатная першая вышэйшая і сярэдняя спецыяльная адукацыя. Іншагароднім студэнтам — інтэрнат або кампенсацыю паловы расходаў на арэнду пакоя. Кожнаму студэнту вочнай формы навучання — стыпендыю з улікам паспяховасці. Льготны праезд у транспарце. Льготны крэдыт для студэнтаў, якія стварылі сям’ю. Адменім плату за праезд дзецям і школьнікам у гарадскім транспарце», — абяцае Цярэшчанка.

Ён гарантуе стварэнне ў краіне эфектыўнай сістэмы правапрымянення і незалежнай судовай сістэмы, пракурорскага нагляду і дзяржкантролю. Генеральнага пракурора і суддзяў усіх узроўняў будзе прызначаць парламент, а не прэзідэнт.

«У міжнароднай палітыцы Беларусь будзе кіравацца мудрым прынцыпам «больш дакладны лік — мацнейшая дружба» і лозунгам «За моцную, стабільную і квітнеючую Беларусь у саюзе з братняй Расіяй, Украінай — сёння, заўтра і на вякі!» — заяўляе Цярэшчанка.