Беларусь падзеліцца з Кубай вопытам рэфармавання эканомікі

Источник материала:

Беларусь гатова прыняць актыўны ўдзел у мадэрнізацыі кубінскай эканомікі. Аб гэтым Прэзідэнт Беларусі Аляксандр Лукашэнка заявіў 18 кастрычніка на сустрэчы з намеснікам старшыні Савета Міністраў Рэспублікі Куба Марына Мурыльё, паведамілі ў прэс-службе беларускага лідара.

Як адзначыў Аляксандр Лукашэнка, візіт кубінскай дэлегацыі ў Беларусь накіраваны на развіццё дамоўленасцяў паміж кіраўнікамі дзвюх дзяржаў, дасягнутых у ходзе нядаўняга афіцыйнага візіту Прэзідэнта Беларусі ў Рэспубліку Куба. "Тады мы дамовіліся, што ў Беларусь прыбудзе кубінская дэлегацыя і мы разгледзім усе пытанні, якія будуць пастаўлены перад намі кіраўніком гэтай дэлегацыі", — сказаў кіраўнік дзяржавы.

"Ведаю, што кіраўніцтва Кубы зацікавілася напрамкамі развіцця і сістэмай рэфармавання нашай эканомікі. І я абяцаў Раулю Кастра, што мы пакажам і раскажам усё, што робім у Беларусі. І калі вам той ці іншы напрамак будзе цікавы, мы абавязкова будзем удзельнічаць у рэалізацыі гэтага на кубінскай тэрыторыі па аналогіі з Венесуэлай", — адзначыў Аляксандр Лукашэнка.

У прыватнасці, адной са сфер, у якой можна ажыццяўляць узаемавыгаднае супрацоўніцтва, з'яўляецца сельская гаспадарка. Яе развіццё на Кубе з'яўляецца адным з прыярытэтаў у працэсе мадэрнізацыі эканомікі ў цэлым. "Для таго каб мадэрнізаваць сельскую гаспадарку, у Кубы ёсць вялікія рэсурсы. Гэта не менш як $1,5 млрд., якія Куба штогод траціць на імпарт прадуктаў харчавання і ўсяго іншага, што звязана з развіццём сельскай гаспадаркі. Лічу, што скарачэнне гэтай сумы на адну-дзве сотні мільёнаў долараў кожны год і іх замяшчэнне вытворчасцю адпаведных тавараў на Кубе было б добрай крыніцай фінансавання і набыцця тэхнікі, і стварэння кааператываў, фермерскіх гаспадарак", — сказаў кіраўнік дзяржавы. Мы гатовы ўлічыць усе вашы пажаданні і дзейнічаць у гэтым напрамку", — запэўніў Аляксандр Лукашэнка.

БЕЛТА.