Осиповичские «Дожинки» приветствовали работников нив

Источник материала:

Свята са жніўным напевам

Яшчэ па-летняму цёплым надвор’ем віталі асіповіцкія “Дажынкі” працаўнікоў ніў у пятніцу ў аграгарадку Вяззе. Месцам сустрэчы стала тэрыторыя Вяззеўскага сельскага Дома культуры. З абедзеннага часу тут працавалі падворкі клубаў раёна, Цэнтраў творчасці дзяцей і моладзі, народных рамёстваў, камбіната бытавога абслугоўвання ды іншых устаноў. Выставы работ, створаных рукамі асіповіцкіх умельцаў, бяспройгрышныя латарэі, сувеніры на любы густ чакалі наведвальнікаў. Удосталь было розных пачастункаў — і шашлыкоў, і садавіны-гародніны, і кандытарскіх вырабаў, якія прапаноўвалі завітаўшым на свята землякам як дзяржаўныя, так і прыватныя гандлёвыя арганізацыі. Папрыгажэў і сам аграгарадок: па добраўпарадкаванні населенага пункта папярэдне быў праведзены не адзін суботнік, з’явіліся новыя агароджы, быў ачышчаны бераг вадасховішча, асаблівая ўвага надзялялася тэрыторыі СДК.

Рознабакова спрыяльны дзень дазволіў правесці ўшанаванне герояў жніва-2018 на адкрытай пляцоўцы, што мела шэраг пераваг: за падзеямі на сцэне маглі назіраць усе жадаючыя, лагодныя павевы ветрыку дарылі камфортныя адчуванні.

Першымі на сцэну запрашаліся старшыня райвыканкама Павел Налівайка і яго намеснік, начальнік райсельгасхарчу Віктар Зуеў, які і адрапартаваў, што аграрыямі Асіповіччыны намалочана 17600 тон збожжа і зернебабовых. Кранальным момантам было ўручэнне кіраўніцтву раёна і гаспадарак караваяў — сімвалаў жыцця, урадлівасці і дабрабыту. Гэтыя прыгожыя вырабы спецыяльна да свята былі зроблены стараннымі рукамі працаўнікоў ААТ “Асіповіцкі хлебазавод”. Павел Налівайка ў сваім прывітальным слове шчыра падзякаваў хлебаробам за іх нялёгкую карпатлівую працу.

Нягледзячы на тое што ў нашы дні свята “Дажынак” набыло новае гучанне, яго душа і сэнс засталіся нязменнымі: глыбокая павага да ганаровай справы хлебароба, людзей, якія памнажаюць багацце роднай зямлі. Бягучы год быў нялёгкім для працаўнікоў аграпрамысловага комплексу, надвор’е, як заўсёды, унесла свае карэктывы ў планы аграрыяў, аднак зроблена ўсё магчымае, каб сабраць хлеб своечасова і без страт.

Шэраг працаўнікоў атрымалі дыпломы і грашовыя прэміі. У спаборніцтве за дасягненне лепшых паказчыкаў на жніве сярод арганізацый стаў філіял “Белшына-агра” ААТ “Белшына”, дзе атрымана 98,8 кілаграма збожжавых і зернебабовых культур на бала-гектар пасяўной плошчы, а валавы збор склаў 5,5 тысячы тон, таму раней за іншых і выклікаўся на сцэну дырэктар сельгаспрадпрыемства Леанід Гардзецкі. Сярод галоўных аграномаў вызначыліся Раман Давідовіч з названай гаспадаркі, Валерый Маслянковіч і Кацярына Максімюк з ААТ “ЖорнаўкаАГРА” і “Лапічы” адпаведна. У інжынернай службе лепшымі названы Максім Шаўчэнка з філіяла “Белшына-агра”, Міхаіл Чарапок з ААТ “ЖорнаўкаАГРА” і “авангардавец” Юрый Раманоўскі. Першыя ў спісе перадавых старшых камбайнераў і камбайнераў адзначаны працаўнікі “Белшыны-агра” Сцяпан Давідовіч і Рыгор Грышановіч, якія намалацілі 916,4 тоны зерня на ўмоўны камбайн. Слаўны працоўны дуэт выклікаўся за заслужанай узнагародай двойчы: гэтыя ўвішныя хлопцы сталі лепшымі і ў маладзёжным спаборніцтве. Другое і трэцяе месцы таксама ў прадстаўнікоў гэтай жа гаспадаркі: Міхаіл Умецкі і Аляксандр Курловіч намалацілі 869,2 тоны на ўмоўны камбайн, а Дзмітрый Мароз — 785. Такі здабытак дазволіў Дзмітрыю заняць другое месца і сярод моладзі, а замкнуў тройку лідараў маладзёжнага спаборніцтва Андрэй Юшкевіч з ААТ “Авангард-Ніва”. Мацнейшымі сёлета ў кагорце вадзіцеляў былі “белшынаўцы” Сяргей Вікторчык і Раман Iўчык — першае і трэцяе месцы, а другое ўзяў працаўнік ААТ “ЖорнаўкаАГРА” Аляксандр Пятрэнка. 777,7 тоны збожжа ў пераліку на ўмоўнае перавёз Iван Жуковіч з філіяла, што дазволіла яму стаць лепшым у маладзёжным спаборніцтве ў сваёй намінацыі.

Падзячныя лісты старшыні райвыканкама за добрасумленную плённую працу атрымалі трактарысты-машыністы ААТ “Каменічы” і “Авангард-Ніва” Юрый Еўдакімовіч і Дзмітрый Каранькоў адпаведна, электрагазазваршчык ААТ “ЖорнаўкаАГРА” Яўген Чаропка.

Да ўшанавання хлебаробаў далучыліся і прафсаюзы. Старшыня Магілёўскай абласной арганізацыі Беларускага прафсаюза работнікаў аграпрамысловага комплексу Віктар Гейдаль, віншуючы асіповіцкіх аграрыяў, падкрэсліў, што ў нас ёсць на каго раўняцца. Напрыклад, у таго ж філіяла “Белшына-агра” другое месца ў вобласці па ўраджайнасці рапсу. I ўвогуле прафсаюзны лідар лічыць АПК раёна моцнай і перспектыўнай галіной. Госць з вобласці ўзнагародзіў Ганаровай граматай Магілёўскага выканаўчага камітэта вадзіцеля ААТ “Ясень-АГРА” Аляксандра Ніцкага, Падзякай — Аляксандра Данілава з ААТ “Авангард-Ніва”, Ганаровымі граматамі камітэта па сельскай гаспадарцы і харчаванні аблвыканкама — загадчыка цэнтральнага машыннага двара філіяла “Белшына-агра” ААТ “Белшына” Віталя Дубінчыка і вадзіцеля ААТ “ЖорнаўкаАГРА” Султана Аскерава, Ганаровай граматай Магілёўскай абласной арганізацыі Беларускага прафсаюза работнікаў АПК — старшага камбайнера ААТ “Бярэзіна-Агра-Люкс” Віталя Карпенку, а Падзячным лістом — вадзіцеля ААТ “Лапічы” Мікалая Кайко.

Старшыня раённага аб’яднання прафсаюзаў Алена Паргачова акцэнтавала ўвагу на тым, што жніво — справа агульная, таму дапамога арганізацый і прадпрыемстваў горада і раёна ва ўборцы ўраджаю высока цэніцца. Дыпломамі і каштоўнымі падарункамі адзначаны “аўтаагрэгатчык” Сяргей Кузняцоў, вадзіцель рыбгаса “Свіслач” Алег Калькоў і трактарыст ДЭУ-73 Андрэй Пісарэвіч.

Старшыня райкама прафсаюза работнікаў АПК Святлана Сідарэнка са сцэны разважала над тым, што ў святочным караваі ёсць уклад кожнага працаўніка, таму і дзякавала асобна кіраўнікам, аграномам, камбайнерам, вадзіцелям, інжынерам і работнікам зернетакоў. Падзячнымі лістамі і прэміямі райкама прафсаюза ўзнагароджаны старшы камбайнер ААТ “Ясень-АГРА” Андрэй Кавальчук, брыгадзір паляводчай брыгады з “Каменічаў” Жанна Бароўская, загадчык пункта харчавання ААТ “Бярэзіна-Агра-Люкс” Алена Скіра, раздатчыца абедаў ААТ “ЖорнаўкаАГРА” Iна Гайкевіч, калектыў пункта харчавання ААТ “Авангард-Ніва” ў складзе Таццяны Ярохінай, Галіны Мінаковай і Надзеі Малевіч.

Асобная старонка свята прысвячалася студэнцкім атрадам. Вітала працоўную моладзь першы сакратар райкама ГА “БРСМ” Алена Надзеявец. Яна адзначыла, што сёлета больш за 130 юнакоў і дзяўчат летам не толькі адпачывалі, але і працавалі. Многія — у сельгаспрадпрыемствах. I той факт, што ў бок моладзі выказвалася шмат станоўчых водгукаў, вельмі прыемны. Дыпломамі і сувенірамі адзначаны старшакласнікі Канстанцін Агейчык, Эдуард Краўчук, Iрына Цітова, Аляксандра Скабіола, Валерый Гурскі, Аляксандр Бабіч, якія вучацца ў школах у Жорнаўцы, Ліпені, Вяззі, Ясені, Лапічах і гімназіі адпаведна, навучэнцы прафесійна-тэхнічнага каледжа Дзмітрый Мельнік, Алена Пятровіч, Анастасія Кандрацьева, Данііл Люсін, Юлія Савіна, Валянціна Рэдзько, Аляксей Кузоўкін, Ксенія Канецкая, Мікіта Снігір — ён лепшы камандзір студэнцкага атрада. Узнагароды за работу з моладдзю атрымалі выкладчык Наталля Кручынская і намеснік дырэктара АДПТК Таццяна Сцёпіна, кіраўнікі прадпрыемстваў, дзе працавалі юнакі і дзяўчаты.

У ліку гасцей свята быў і старшыня Глускага раённага Савета дэпутатаў Генадзь Ліпскі. Ён пажадаў, каб паўднёвы рэгіён Магілёўшчыны, куды ўваходзім мы і нашы суседзі, заўсёды не толькі сябраваў, але і меў добрыя здабыткі.

Цікавым аказаўся і працяг вераснёўскага фэсту. Яшчэ некалькі гадзін ішоў канцэрт. Спіс выступаючых атрымаўся немалым, свята аб’яднала больш за сотню ўдзельнікаў з усёй Асіповіччыны — і дарослых, і дзяцей. Прыемна было адчуваць прафесіяналізм нашых артыстаў. Сваю акцыю для падпісчыкаў, якія аформілі абанемент на выданне на кастрычнік-снежань у гэты дзень, правяла “раёнка”: падарунак ад рэдакцыі атрымала асіпаўчанка Вікторыя Дарафейчык. I, безумоўна, у кожнага наведвальніка падчас мерапрыемства была магчымасць зрабіць цікавыя фота, чым многія і скарысталіся.

Асаблівая ўвага на свяце надзялялася дзіцячаму адпачынку: дзейнічалі гульнёвыя і забаўляльныя пляцоўкі, дзе можна было не толькі выпрабаваць свой спрыт, але і выйграць цікавы прыз. Аматары яркіх эмоцый мелі магчымасць палюбавацца аграгарадком Вяззе і яго наваколлем з вышыні птушынага палёту: працаваў паветраны транспарт ДТСААФ з Бабруйска і Віцебска.

У цэлым народнае гулянне ў чарговы раз пацвердзіла, што агульныя намаганні заўсёды выліваюцца ў паспяховую справу — хоць на жытнёвым полі, хоць на канцэртнай пляцоўцы. Ну а што тычыцца герояў свята, то доўга расслабляцца ім няма калі: трэба ўбіраць кукурузу на сілас і зерне, працягваць сяўбу азімых, капаць цукровыя буракі. I калі дажджы, якія распачаліся на наступны дзень пасля фэсту, камусьці недаспадобы, то хлебаробаў яны радуюць: зямлі зараз патрэбна вільгаць, каб пасеянае азімае збожжа, якое і складзе аснову ўраджаю на наступны год, пачало набірацца жыццёвай сілы.

Валянціна КОРБАЛЬ.

Фота Дзмітрыя САЎРЫЦКАГА і Настассі МАЦЮШЭНКА.