Главная
Гороскопы
У ААТ «Белая Ліпа» пачалі нарыхтоўку сена.
Іван Кармазін
Яго адразу адгружаюць на фермы, дзе ўтрымліваюць маладняк буйной рагатай жывёлы, і ўключаюць у рацыён цялят.
З сенажацяў, што раскінуліся за вёскай Запруддзе на меліяраваных землях, адпраўляюць у Пожанькі. Да мясцовай фермы нейкія 4-5 кіламетраў. Начальнік вытворчага ўчастка Віктар Бандарэвіч упэўнены, што яго выкарыстанне эканамічна абгрунтавана, прынясе карысць фізіялагічнаму здароўю жывёлы, дапаможа збалансаваць рацыён, а значыць павялічыць прывагі. З яго довадамі згодна галоўны аграном гаспадаркі Марыя Крупенка. Яна дадае:
— На сенажацях пераважаюць злакавыя натуральныя травы. Яны ўступаюць па пажыўнасці бабовым, затое багатыя на пратэіны, цукар, бо скошаны ў аптымальную пару. Такое сена ў народзе называюць «пятроўскім» і кажуць, што яго можна заварваць, як чай.
У «Белай Ліпе» асноўная частка механізатараў і тэхнікі ў гэтыя дні занята на касавіцы траў. Значныя наяўныя матэрыяльныя рэсурсы кінуты на касьбу купкоўкі і люцэрны. З такой сумесі мяркуецца на днях пачаць закладку сенажу. А вось Іван Кармазін і Уладзімір Бярозка рыхтуюць сена. Першы працуе на трактары, агрэгатаваным рулонным прэс-падборшчыкам, другі — граблямі. Праца спорыцца, бо тэхніка была своечасова падрыхтавана. Першыя гектары ляглі ў пракосы яшчэ ў пачатку чэрвеня. Для работнікаў, занятых на корманарыхтоўцы, створаны належныя ўмовы працы.
Уладзімір Бярозка
— Нас своечасова падвозяць да месца працы, забяспечваюць гарачым харчаваннем. А галоўнае, заробленыя грошы своечасова выплачваюць, — расказаў Іван Кармазін.
Яшчэ не так даўно ён працаваў у райаграсервісе. Пасля таго, як у арганізацыі пачаўся працэс банкруцтва, частку тэхнікі перадалі ААТ «Белая Ліпа». Памянялі месца працы і механізатары, за якімі яна была замацавана. Так Іван Кармазін, Уладзімір Бярозка разам з яшчэ пяццю калегамі аказаліся ў іншай гаспадарцы, пра што хлопцы не шкадуюць. Рады былі папаўненню і ў «Белай Ліпе», бо лішняй тэхнікі і рабочых рук у арганізацыі няма.
— Тэхніка, безумоўна, не новая, запатрабавала матэрыяльных ўкладанняў. Каб прывесці яе ў адпаведны рабочы стан, давялося папрацаваць і інжынернай службе, і механізатарам. Аднак зараз ёсць цвёрдая ўпэўненасць, што з часам панесеныя затраты акупяцца, — разважае Зоя Конышава, дырэктар ААТ «Белая Ліпа». Курс на ўмацаванне кармавой базы жывёлаводчай галіны працягваецца. Вынікам яго павінна стаць павелічэнне аб’ёмаў кармоў з траў, паляпшэнне іх пажыўнасці, што прывядзе да росту вытворчасці малака і мяса, росту эканомікі.
Аляксандр ЯЎГЕНАЎ.
Фота аўтара.