У Мінску сустракаюцца дэлегацыі ўрадаў краін ЕўрАзЭС і мытнага саюза

Источник материала:

47‑е пасяджэнне Інтэграцыйнага камітэта Еўразійскай эканамічнай супольнасці і 10‑е пасяджэнне камісіі мытнага саюза Беларусі, Казахстана і Расіі пройдуць 26 лістапада ў Мінску. Беларускую дэлегацыю на іх узначальвае віцэ‑прэм’ер Андрэй Кабякоў.

У парадку сустрэчы дэлегацый урадаў краін ЕўрАзЭС — Беларусі, Казахстана, Кыргызстана, Расіі, Таджыкістана і Узбекістана — 17 пытанняў.

Паводле інфармацыі беларускага МЗС, плануецца, у прыватнасці, абмеркаваць тэму фарміравання мытнага саюза і адзінай эканамічнай прасторы ў рамках ЕўрАзЭС, а таксама праекты наступных дакументаў: пратакола аб завяршэнні фарміравання зоны свабоднага гандлю ЕўрАзЭС; пагаднення аб супрацоўніцтве дзяржаў — членаў Супольнасці ў галіне адукацыі; канцэпцыі стварэння міждзяржаўнага банка даных аб працоўных‑мігрантах — грамадзянах дзяржаў — членаў ЕўрАзЭС.

Акрамя гэтага, удзельнікі пасяджэння плануюць абмеркаваць тэму супрацоўніцтва ў сферы транспарту, бюджэтна‑фінансавыя пытанні, а таксама пытанні, якія тычацца дзейнасці галіновых органаў ЕўрАзЭС.

У парадак пасяджэння камісіі мытнага саюза Беларусі, Казахстана і Расіі ўключана 11 пытанняў.

Бакі праінфармуюць адзін аднаго аб правядзенні ўнутрыдзяржаўных працэдур, якія неабходны для ўваходжання ў сілу дакументаў, якія фарміруюць дагаворна‑прававую базу мытнага саюза.

Плануецца разгледзець праекты пагадненняў аб устанаўленні і прымяненні ў мытным саюзе парадку залічэння і размеркавання ўвазных мытных пошлін, іншых пошлін, падаткаў і збораў, якія маюць эквівалентнае значэнне; аб стварэнні інстытута падатковых прадстаўнікоў дзяржаў — членаў саюза; аб стварэнні, функцыянаванні і развіцці інтэграванай інфармацыйнай сістэмы знешняга і ўзаемнага гандлю ў рамках саюза.

Акрамя таго, паведамляе прэс‑служба МЗС, плануецца абмеркаваць шэраг пытанняў аб рэгуляванні знешняга гандлю ў сувязі з плануемым пачаткам функцыянавання мытнага саюза трох краін: вядзенне статыстыкі, адзіную сістэму забарон і абмежаванняў, паэтапную адмену абмежавальных мер эканамічнага характару ва ўзаемным гандлі.

Сённяшнія мерапрыемствы праходзяць напярэдадні сустрэч кіраўнікоў дзяржаў краін ЕўрАзЭС і мытнага саюза, якія адбудуцца ў Мінску 27 лістапада.

Чакаецца, што ў ходзе саміта прэзідэнты Беларусі, Казахстана і Расіі падпішуць дакументы аб пачатку функцыянавання мытнага саюза трох краін.

Прэзідэнт Казахстана Нурсултан Назарбаеў прыбыў у Мінск увечары 25 лістапада з афіцыйным візітам. Прыезд Дзмітрыя Мядзведзева чакаецца 27 лістапада —

аб гэтым паведаміла прэс‑служба расійскага прэзідэнта.

БелаПАН