АБЗАЦ

Источник материала:

У Воранаўскім раёне вадзіцель "Фальксвагена" наехаў адразу на траіх пешаходаў. 17-гадовы жыхар вёскі Больцішкі вяртаўся дадому, але раптам яму стала дрэнна: прыступ эпілепсіі паваліў яго прама на праезнай частцы дарогі. Аднавяскоўцы не пакінулі яго ў бядзе — да юнака збегліся некалькі чалавек, аднак ніхто не падумаў, што найперш трэба знесці яго з дарогі і сысці самім. У выніку вадзіцель легкавіка, што рухаўся па цёмнай дарозе, занадта позна, пасля сустрэчнага раз'езду, заўважыў на дарозе натоўп і наехаў на людзей. У выніку дзве жанчыны і малады чалавек, з якім здарыўся прыступ, атрымалі траўмы і былі шпіталізаваныя.

Вярхоўны Суд Беларусі вынес прысуд у дачыненні да былога намесніка Дзяржаўнага памежнага камітэта Яўгена Камарніцкага. Ён прыгавораны да 5 гадоў абмежавання волі з канфіскацыяй маёмасці за атрыманне хабару. Па гэтай жа справе прыгавораны да 4 гадоў пазбаўлення волі з канфіскацыяй маёмасці і пазбаўленнем звання падпалкоўніка запасу вайсковец Вячаслаў Апаровіч.

У выніку падзення 19 цыстэрнаў на піваварным заводзе ў Руставі (Грузія) з цыстэрнаў выцекла каля 900 тон піва. Людзі не пацярпелі — пакуль цыстэрны падалі, яны паспелі выбегчы з небяспечнага месца. Кошт піва, што выцекла з цыстэрнаў, склаў прыкладна 1,5 мільёна лары (900 тысяч долараў). Агульны памер стратаў, нанесеных кампаніі, дасягае 3 мільёнаў лары (каля 1,8 мільёна долараў).

Украінскія памежнікі спынілі спробу кантрабанды наркатычных рэчываў жыхаром Данецкай вобласці. Інфармацыю пра спробу кантрабанды яны атрымалі напярэдадні. Падчас афармлення цягніка Масква — Кіславодск група агляду пры дапамозе службовага сабакі выявіла 3 шпрыцы з 30 грамамі цёмна-карычневага рэчыва. Экспрэс-аналіз паказаў, што гэта — опій. Сродкі для ін'екцый 29-гадовы жыхар Данецкай вобласці старанна схаваў: два шпрыцы дасталі з вялікага кавалка сала, трэці — са слоіка з варэннем. Парушальніка арыштавалі.

Амерыканскі мільянер Шолам Вайс, прыгавораны за фінансавыя махінацыі ў 2000 годзе да самага доўгага турэмнага зняволення ў 845 гадоў, звярнуўся ў суд у надзеі на перагляд прыгавору. Прадпрымальнік з Нью-Ёрка просіць змякчыць яму пакаранне гадоў на 800, каб яго тэрмін "склаў гадоў 35 альбо каля таго". 55-гадовы Шолам Вайс быў прыгавораны да 845 гадоў зняволення і штрафу ў $300 млн за 78 даказаных выпадкаў вымагання і махлярства з выкарыстаннем электронных сродкаў, а таксама за адмыванне грошай падчас краху буйной страхавой кампаніі. Яго саўдзельнік быў прыгавораны да 740 гадоў турмы, аднак памёр праз 4 гады пасля ўзяцця пад варту.