Героя ўшанавалі па заслугах

Источник материала:

Наша газета паведамляла, што ў студзені выпадковы сведка пажару ў адным з дамоў Маларыты бясстрашна ўвайшоў у палаючую кватэру і вынес адтуль дваіх дзяцей.

35-гадовы слесар вагоннага дэпо Пётр Аўдзяюк разам з жонкай ішоў па вуліцы а палове дзесятай вечара. Калі заўважылі дым, што паваліў з вокнаў, вырашылі не чакаць прыезду выратавальнікаў, а дзейнічаць самастойна. Бо ў такі час зімой вельмі верагодна, што ў кватэры знаходзяцца людзі. Спачатку Пётр хацеў выламаць уваходныя дзверы, але гэта зрабіць не ўдалося, тады ён выбіў шыбу і рашуча скочыў ў пекла пажару. У дыме знайшоў па плачы дзяцей і ў лічаныя секунды перадаў іх у акно жонцы. Дзеці трох і аднаго гадоў засталіся жывыя і здаровыя дзякуючы мужнасці і адвазе Пятра і Валянціны Аўдзяюкоў. Дарослыя ў той дзень пакінулі малых без нагляду. Трохгадовы хлопчык знайшоў "цацку" — электракіпяцільнік — і уключыў яго ў разетку. На шчасце, побач праходзілі людзі...

І вось у калектыве вагоннага дэпо, дзе працуе Пётр, было наладжана яго ўрачыстае ўшанаванне. Начальнік Брэсцкага абласнога ўпраўлення МНС Канстанцін Шаршуновіч дзякаваў за выратаванне дваіх дзяцей ад імя абласнога выканаўчага камітэта і ўручыў грамату аблвыканкама. Былі таксама каштоўныя падарункі і цёплыя словы. Шкада, што за кадрам мерапрыемства засталася Валянціна Аўдзяюк. Што ж, сціплых жанчын лёс, бывае, узнагароджвае дастойнымі мужамі.