Шанцы ёсць

Источник материала:

Кватэрнае пытанне

Наша сям'я (муж, жонка, дарослы сын студэнт) па дагаворы найму займае два пакоі ў трохпакаёўцы. Наймальніца трэцяга — выйшла замуж, збіраецца пераязджаць у іншы горад, так што яе пакой павінен вызваліцца. Пытанне: ці можа выканкам засяліць туды некага з чаргавікоў? Ці ёсць шанцы ў нас вылезці з камуналкі (з улікам таго, што на 1 чалавека ў нас тады будзе больш за 20 кв. м агульнай плошчы?)

Раней дзейнае правіла пра тое, што вызваленае ізаляванае жылое памяшканне ў кватэры, дзе пражывае некалькі наймальнікаў, павінна выдзяляцца грамадзянам, якія пражываюць у гэтай кватэры і маюць жылую плошчу менш за вызначаную норму на аднаго чалавека, не прымяняецца пасля ўваходжання ў сілу з 1 ліпеня 1999 года Жыллёвага кодэкса. Згодна з артыкулам 74 Кодэкса, выдзяленне вызваленага пакоя ў "камунальнай" кватэры аднаму з наймальнікаў не залежыць ад памеру жылога памяшкання, якое ён будзе пасля гэтага займаць.

Пры разглядзе гэтага пытання выканкам будзе таксама кіравацца нормамі Палажэння аб парадку ўліку грамадзян, якія маюць патрэбу ў паляпшэнні жыллёвых умоў, выдзялення жылых памяшканняў дзяржаўнага жыллёвага фонду (зацверджана Указам Прэзідэнта Рэспублікі Беларусь ад 29 лістапада 2005 г. № 565).

Згодна з пунктам 55 гэтага Палажэння, вызвалены ізаляваны жылы пакой дзяржаўнага жыллёвага фонду ў кватэры, у якой пражываюць некалькі наймальнікаў па дагаворы найму жылога памяшкання дзяржаўнага жыллёвага фонду выдзяляецца па пісьмовай заяве аднаму з іх па дагаворы найму жылога памяшкання ў парадку чарговасці зыходзячы з часу прыняцця на ўлік асобаў з патрэбай у паляпшэнні жыллёвых умоў.

Калі ў кватэры адсутнічаюць наймальнікі, якія маюць патрэбу ў паляпшэнні жыллёвых умоў, вызвалены ізаляваны жылы пакой выдзяляецца наймальніку, які пражывае ў кватэры па дагаворы найму жылога памяшкання дзяржаўнага жыллёвага фонду і не мае патрэбы ў паляпшэнні жыллёвых умоў, па яго пісьмовай заяве з улікам даты падачы такой заявы.

Віктар Савіцкі.