СААЗ прадказала двухразовы рост колькасці памерлых ад раку

Источник материала:

Штогадовая колькасць лятальных выпадкаў раку павялічыцца ўдвая на працягу наступных 20 гадоў. Такі прагноз зрабілі спецыялісты Міжнароднага агенцтва па вывучэнні раку Сусветнай арганізацыі аховы здароўя (СААЗ), паведамляе Fox News.

Паводле інфармацыі GLOBOCAN, у 2008 годзе ў свеце было выяўлена прыкладна 12,7 мільёна злаякасных новаўтварэнняў. Каля 7,6 мільёна хворых памерлі ад раку. Найбольш распаўсюджанымі відамі раку ў 2008 годзе былі пухліны лёгкіх, малочных залозаў і тоўстага кішэчніка.

Спецыялісты ІARC адзначылі, што структура захворвання на рак стала больш раўнамернай. У прыватнасці, узрасла колькасць злаякасных новаўтварэнняў, якія выяўляюцца ў жыхароў краін, што развіваюцца. Паводле звестак арганізацыі, у 2008 годзе на гэтыя краіны прыпала каля 56 працэнтаў выяўленых пухлінаў, а таксама 63 працэнты лятальных выпадкаў раку.

Высокі ўзровень смяротнасці ад раку ў 2008 годзе быў зафіксаваны ў краінах Усходняй Еўропы і былога СССР. У прыватнасці, у Расіі ад раку памерла больш за 180 чалавек на 100 тысяч жыхароў. У Венгрыі, Манголіі, Арменіі, Уругваі, Літве і Беларусі гэты паказчык перавысіў 200 чалавек.

Мяркуючы, што тэмпы росту захворвання на рак не зменяцца на працягу бліжэйшых 20 гадоў, вучоныя зрабілі прагноз на названы перыяд. На іх думку, да 2030 года колькасць злаякасных пухлінаў, якія выяўляюцца штогод, дасягне 21,4 мільёна, а смяротнасць ад раку складзе прыкладна 13,2 мільёна хворых у год.