АБЗАЦ

Источник материала:

Самай высокай ураджайнасці бульбы ў Беларусі дасягнулі сёлета ў Гродзенскай вобласці: з гектара тут атрымана ў сярэднім 245 ц/га, што на 57 ц вышэй за сярэднерэспубліканскі паказчык. Першае месца па ўраджайнасці бульбы займае Гродзенскі раён — 330 ц/га.

П'яны трактарыст спыніў 3 хуткія цягнікі. Рух цягнікоў Брэст—Масква, Варшава—Мінск і Мінск—Варшава быў затрыманы ад 25 хвілін да 1 гадзіны 20 хвілін. 25-гадовы трактарыст ААТ "Лінова" Пружанскага раёна на трактары МТЗ-1221 з прычэпам не справіўся з кіраваннем. Трактар перакуліўся на рэйкі і сарваў правады кантактнай сеткі. У кабіне побач з вадзіцелем быў пасажыр — 56-гадовы жывёлавод гэтай жа гаспадаркі. Абодва былі нападпітку. З цялеснымі пашкоджаннямі яны змешчаныя ў бальніцу. Сума стратаў устанаўліваецца.

Супрацоўнікі Гродзенскай рэгіянальнай мытні затрымалі 8,3 млн штук цыгарэт агульным коштам больш за Br470 млн.

Каля 2 тыс. чалавек стаяць на ўліку ў органах унутраных спраў краіны за занятак прастытуцыяй, паведаміў журналістам нам. начальніка 2-га аддзела ўпраўлення па наркакантролі і супрацьдзеяні гандлю людзьмі МУС Беларусі Уладзімір Емяльянаў: "На ўліку ў органах унутраных спраў Беларусі стаіць каля 2 тыс. асобаў, што займаюцца прастытуцыяй, з якіх 5 мужчын", сказаў ён.

За працяглую няўплату паслугаў ЖКГ 42 чалавекі ў Беларусі з пачатку гэтага года былі пазбаўленыя права ўласнасці на жыллё і выселеныя з яго без прадастаўлення іншай жылплошчы. Зараз запазычанасць жыхароў краіны па аплаце паслугаў ЖКГ складае каля Br33,3 млрд.

Карціна Марка Шагала "Бесціярый і музыка" пайшла з малатка на аўкцыёне ў Сеуле (Паўднёвая Карэя) за $4,18 млн. Яна стала самым дарагім творам заходняга мастацтва ХХ стагоддзя, што калі-небудзь прадавалася ў Азіі. Працу Пабла Пікаса "Мадэль у студыі" прадалі за $2,1 млн. "Мао Цзэдун" Эндзі Уорхала пайшоў за $49 тыс.