А ты ехаў...

Источник материала:

Бясконцай дарогай уяўляецца нам жыццё. І прамяністым робіцца яно, калі смела рухаешся па ёй, не парушаючы прыроднага суладдзя, насустрач хараству, да якога цягнецца душа.

Дарогі заслужанай артысткі Беларусі Святланы Суседчык і ансамбля народнай музыкі "Бяседа" супалі. Яны паядналіся ў сумесных дзеях і сталі бальшаком — тым шырокім шляхам, па якім несупыннай плынню ідзе люд, нясе песню. Весці за сабой, акрыляць спевам, надзяляць радасцю і надзеяй — святы абавязак. І "Бяседа", і яе вядучая салістка выконваюць яго годна, з гонарам.

З маленства Святлана Іванаўна жыве з песняй і ў песні. Гэтая прасветлая любоў да яе перайшла ад бацькоў — Ніны Сямёнаўны, якая і цяпер хораша спявае, і Івана Мікалаевіча Муцянкі, вясковага каваля і гарманіста. І родныя мясціны гадавалі, песцілі яе. Там, у вёсцы Вязавіца Калінкавіцкага раёна, дзе нарадзілася 24 снежня 1955 года, яна ўспрыняла народную манеру выканання песень і жыццярадасны, поўны высакароднай энергіі прыродны дух. Навучанне ў Магілёўскім культурна-асветным вучылішчы (закончыла таксама і Інстытут сучасных ведаў), творчая праца ў Дзяржаўным акадэмічным народным хоры імя Генадзя Цітовіча (у 1975—1994 гадах, а ў 1989 годзе тут атрымала ганаровае званне) спрыялі развіццю выканальніцкага майстэрства.

Найбольш плённа выявіўся артыстычны талент Святланы Суседчык у ансамблі народнай музыкі "Бяседа". У ім яна з першага дня стварэння. Сюды прынесла і любімыя песні з родных мясцін, і той жыццестваральны дух, які сілкуе ўвесь калектыў і вылучае яго сярод іншых. З поспехам, па-мастацку вобразна выконвае звонкагалосая салістка як народныя вакальныя творы, так і аўтарскія (сярод іх "Мамін голас", "Маміна вішня", "Каліна-ягада", "Узыходзіць месяц"). А ў песні "А ты ехаў..." яна таленавіта перадае характар беларускай дзяўчыны і свой асабісты — смелы, вольналюбівы, іранічны, дасціпны.

..Касмічна-зямным ззяннем пазначаны дарогі Святланы Суседчык і "Бяседы". Пасля зімовага сонцазвароту пачынаюцца іх жыццёвы кругабег, творчая супольнасць. Шлях адзіны, мэтанакіраваны — да духоўнага хараства. І асвечаны ён песняй.

Падрыхтаваў Міхась ШАВЫРКІН.

Беларуская народная песня

А ты ехаў, ехаў, ехаў,

Чаму ў сваты не заехаў?

Ў мяне брат, ў мяне тата,

А я дзеўка не занята.

Як ты ехаў, то я спала,

Як ты крыкнуў, то я ўстала,

Як ты свіснуў на каня —

Я галоўку падняла.

Сёння як былінка стала,

Тры дні хлеба ў рот не брала

І не піло кроплі воды —

Для тваёй усё выгоды.

А ты ехаў, ехаў, ехаў,

Чаму ў сваты не заехаў?

Ў мяне хата белая,

А я дзеўка смелая.

А ты ехаў, ехаў, ехаў,

Чаму ў сваты не заехаў?

Ў мяне гусь і цялушка,

А я дзеўка-весялушка.

Ты мінуў маю хаціну,

Да другой спяшаў дзяўчыны.

Хоць аб'ездзі цэлы свет,

За мяне там лепшай нет!

Апошнія два радкі кожнай страфы паўтараюцца. Варыянт мелодыі трэцяй і шостай строф пададзены трэцім радком нот.