Смачнае жыццё старога аўтобуса

Источник материала:

У Чэрыкаве з'явілася кавярня на колах "Бусляня"

Кавярня належыць Чэрыкаўскаму дзяржаўнаму прафесійнаму ліцэю № 11, дзе рыхтуюць спецыялістаў у галіне грамадскага харчавання. Перш за ўсё гэта магчымасць для навучэнцаў і папрактыкавацца ў прафесіі, і зарабіць грошы.

Ідэя пераўтварыць спісаны аўтобус у перасоўную кавярню ўзнікла ў дырэктара ліцэя Анатоля Ляпешкі.

— Маладыя людзі па чарзе адпрацоўваюць навыкі прадаўца і афіцыянта, — расказвае ён. — Па-другое, гэта крыніца заробку для ліцэя, які забяспечвае сваіх навучэнцаў бясплатным харчаваннем. І па-трэцяе, кавярня, безумоўна, стварае добры імідж нашай навучальнай установе.

Спачатку перасоўная кавярня брала ўдзел у розных кірмашах, а цяпер спынілася ў Чэрыкаве, непадалёк ад аўтастанцыі і парку адпачынку. Працуе штодзень, ад 14-й да 21 гадзіны. У кавярні 20 месцаў.

Назвалі яе "Бусляня" ў гонар птушак, якія селяцца штогод каля будынка ліцэя. Стыль — нацыянальны, таму ў меню пераважаюць смажанкі, булачкі і бліны, дапоўненыя сучаснай транснацыянальнай ежай — хот-догам, а таксама разнастайнымі напоямі.

У кавярні толькі 5% нацэнкі, таму цэны зусім не "кусаюцца": смажанка — 1250 рублёў, бліны з рознымі напаўняльнікамі — ад 480 да 690, хот-дог — 1500 рублёў. Дэмакратычныя цэны прыцягваюць у "Бусляня" пераважна моладзь.

— Штодзень ходзім сюды пасля заняткаў, — расказалі дзяўчаты. — Вядома ж, добра, што тут усё даволі танна. Акрамя таго, цікава прыдумана — кавярня ў аўтобусе! Можна не проста паесці, але пасядзець і пагутарыць з сяброўкамі, расслабіцца і паглядзець у акно, падумаць.

Штодзень вучні ліцэя вырабляюць каля тысячы адзінак розных булак і прадаюць іх праз стацыянарны кафэтэрый і перасоўную кавярню. Штодзень ліцэй зарабляе 100 тысяч рублёў, і кіраўніцтва лічыць гэта неблагім вынікам.

Заробак прадаўцоў і афіцыянтаў — 5% ад таваразвароту, плюс прэміі за добрую працу.

— Але ўсё ж грошы — не галоўнае, — падкрэсліваюць у ліцэі. — Стасункі з пакупнікамі розных узростаў і катэгорый — гэта бясцэнная практыка.

— У нас сапраўды шмат наведвальнікаў, — расказала афіцыянтка Вольга Гарунова. — У асноўным маладыя людзі, і ўсе такія культурныя! Нам усё цікава: практыка, стасункі, заробак. Такіх кавярняў, як наша, павінна быць больш, тады і моладзі будзе дзе бавіць вольны час. Наша "Бусляня" на колах — гэта добра і арыгінальна!

Ілона Іванова. Фота аўтара.

г. Чэрыкаў.