Ах, белы цеплаход...

Источник материала:

У Віцебску белы цеплаход пачаў перавозіць пасажыраў па Заходняй Дзвіне з цэнтра горада (плошча Перамогі) на ўскраіну (парк адпачынку "Імя Савецкай Арміі").

Як паведамілі "Звяздзе" ў віцебскім рачным порце, працягласць воднай прагулкі пакуль што пяць кіламетраў, і доўжыцца яна каля сарака хвілін. Што тычыцца аплаты за магчымасць падарожжа па хвалях, білет абыдзецца ў 10 тысяч рублёў, а дзецям ва ўзросце да пяці гадоў наогул купляць білет не трэба, ва ўзросце да 10 год — білет каштуе пяць тысяч рублёў. Цэны на білеты засталіся фактычна на ўзроўні мінулага года. Курсіруе цеплаход штодня з 10 гадзін раніцы і да васьмі вечара. Каб пакатацца, выстройваюцца чэргі. Вельмі палюбіўся цеплаход тым, хто святкуе вяселле або праводзіць іншыя мерапрыемствы. Заявак ужо шмат.

Водныя экскурсіі ў старажытным горадзе аднавілі летась праз дзесяцігоддзі. Каб гэта стала магчымым, пашырылі і паглыбілі рэчышча ракі. У планах ужо да пачатку юбілейнага музычнага "базару" запуск яшчэ аднаго цеплахода такога ж класа з вельмі "ціхім" рухавіком шведскай вытворчасці.

Цікава, што рачнікі ўжо атрымалі заданне ад кіраўніцтва Віцебскага аблвыканкама зрабіць магчымым воднае падарожжа паміж Полацкам і Віцебскам.

Аляксандр ПУКШАНСКІ. Фота аўтара.