ХРОНІКА АПОШНІХ ПАДЗЕЙ

Источник материала:

Еўракамісія рыхтуе прапановы па памежным кантролі ў Шэнгене

Лідары 27 краін Еўрасаюза даручылі Еўракамісіі падрыхтаваць і прадставіць у верасні гэтага года праект заканадаўчай ініцыятывы, якая прапісвае выключныя выпадкі часовага аднаўлення памежнага кантролю ў Шэнгенскай зоне.

Апроч краін ЕС, законапраект павінен ухваліць Еўрапарламент, у якім крытычна ставяцца да магчымасці перагляду шэнгенскага кодэкса пра межы. Лідары краін ЕС на саміце 24 чэрвеня ў Брусэлі заявілі пра цвёрдую падтрымку шэнгенскай дамовы і прыхільнасць прынцыпу вольнага перамяшчэння людзей, які з'яўляецца кардынальным дасягненнем еўрапейскай інтэграцыі. Пры гэтым, як паведаміў старшыня Еўрапейскага савета Херман ван Ромпей, удзельнікі сустрэчы ў вярхах выказаліся за ўдасканаленне дзейных правіл шэнгенскага кодэкса і ўводзіны механізму абароны на выпадак "выключных акалічнасцяў", якія паставілі б пад пагрозу функцыянаванне супрацоўніцтва ў Шэнгенскай зоне, але не парушаючы свабоды перамяшчэння людзей.

Сусветны банк прадракае Расіі крызіс "грэчаскага тыпу" да 2030 года

Калі Расія не перагледзіць сваю макраэканамічную палітыку, то ўжо праз 20 гадоў можа паўтарыць лёс Грэцыі, лічаць у Сусветным банку (СБ). Расійскія эканамісты прызнаюць, што безаглядная арыентацыя на нафтагазавую рэнту і назапашванне сацыяльных выдаткаў сапраўды могуць павесці Расію па гэтым сцэнары, прычым значна раней.

"На гэты момант эканоміка трымаецца на коштах на нафту, а не на разважлівай макраэканамічнай палітыцы", — заявіў у пятніцу эканаміст Сусветнага банка Сяргей Улатаў (цытата па Blооmbеrg). Калі ўрад сур'ёзна не задумаецца пра скарачэнне выдаткаў, то праз 20 гадоў Расія можа паўтарыць шлях Грэцыі і абрасці непасільным цяжарам дзярждаўгоў, прадказаў ён.

Нават калі кошты на нафту ўтрымаюцца на ўзроўні 115 долараў за барэль, краіна не здолее пакрыць дэфіцыт пенсійнага фонду ўжо да 2015 года. Да таго ж маштабныя інфраструктурныя праекты, такія як Алімпіяда ў 2014 годзе і чэмпіянат свету па футболе ў 2018 годзе, створаць дадатковую бюджэтную нагрузку, упэўнены эканаміст СБ. "Расіі прыйдзецца браць крэдыт. Цяпер у краіне ёсць дастаткова магутнасцяў, але наколькі іх хопіць?" — задаецца пытаннем ён.

Кіроўцы ў Францыі страйкуюць супраць павелічэння пенсійнага ўзросту

Прафсаюзы Францыі заклікалі больш за 600 тысяч кіроўцаў-прафесіяналаў прыняць удзел у распачатым у ноч на панядзелак агульнанацыянальным страйку, удзельнікі якога пратэстуюць супраць павелічэння пенсійнага ўзросту, паведамляе "Франс Прэс".

Нагодай для страйку стала ініцыяваная ўрадам пенсійная рэформа, у выніку якой узрост датэрміновага выхаду на пенсію для шэрагу катэгорый працаўнікоў, у прыватнасці, для кіроўцаў, павялічыўся з 55 да 57 гадоў. Пенсійная рэформа, у выніку якой узрост выхаду на пенсію павялічыўся з 60 да 62 гадоў, прымусіла працадаўцаў перагледзець умовы датэрміновай пенсіі. У канцы мая чатыры прафсаюзы і федэрацыя дарожнага сектара падпісалі дамову, у рамках якой дапускаецца датэрміновы выхад на пенсію для кіроўцаў ва ўзросце 57 гадоў, калі яны маюць стаж працы не меней за 25 гадоў. У сваю чаргу, прадстаўнікі французскай Усеагульнай канфедэрацыі працы, у якую ўваходзіць значная колькасць кіроўцаў-прафесіяналаў, адмовіліся ад падпісання дамовы, патрабуючы змяніць заканадаўства такім чынам, каб змена ўзросту выхаду на пенсію ажыццяўлялася паступова.