Новы фармат перавозак — да паслуг пасажыраў

Источник материала:

1 ліпеня Беларуская чыгунка пачне тэставую эксплуатацыю з пасажырамі электрацягнікоў, прызначаных для гарадскіх ліній новага фармату пасажырскіх перавозак.

Як паведамілі ў Мінскім аддзяленні Беларускай чыгункі, прадугледжана курсіраванне электрацягніка некалькі разоў раніцай і некалькі вечарам па маршруце Мінск-Пасажырскі — Беларусь (г.Заслаўе). Напрыклад, адпраўленне са сталіцы запланавана раніцай на 8.57, увечары — на 17.15 і 19.10. З Беларусі (г. Заслаўе) на Мінск электрацягнік будзе адпраўляцца ў 6.37, 10.12, 18.05 і 20.10. Кошт білета за адну паездку складзе 2 тысячы рублёў (з і да любога прыпынку). Час следавання — 40 хвілін. У цягніку прадугледжаны: кандыцыяванне паветра, мяккія зручныя сядзенні, пляцоўка для дзіцячых вазкоў, веласіпедаў, інвалідных калясак. Падчас тэставай эксплуатацыі будзе праведзены маніторынг аказання новых відаў паслуг і будуць выпрацаваны прынцыпы абслугоўвання пасажыраў, уключаючы рэалізацыю праязных білетаў у салонах электрацягнікоў, прадастаўлення сэрвісу і камфорту сучаснага ўзроўню. Рэгулярны рух па маршруце гарадскіх ліній пачнецца пасля завяршэння рэканструкцыі чыгуначнай інфраструктуры і падвядзення вынікаў тэставай эксплуатацыі.

Сяргей РАСОЛЬКА.