Дадатковыя гарантыі — без змен

Источник материала:

У Мінску плануецца захаваць цяперашнія дадатковыя гарантыі для ветэранаў вайны і асоб, якія пацярпелі ад наступстваў Вялікай Айчыннай, — аб гэтым паведаміла намеснік начальніка ўпраўлення сацыяльнай падтрымкі насельніцтва камітэта па працы, занятасці і сацыяльнай абароне Мінгарвыканкама Ірына Дудка.

Варта нагадаць, што, паводле гарадской праграмы развіцця сацыяльнага абслугоўвання на 2011—2015 гады, ветэранам вайны і асобам, якія пацярпелі ад наступстваў Вялікай Айчыннай, вызначаны шэраг дадатковых гарантый. Адным з адметных момантаў гэтай праграмы з'яўляецца прадастаўленне сталічным інвалідам і ўдзельнікам Вялікай Айчыннай, непрацуючым мужу ці жонцы вайскоўцаў, якія загінулі падчас вайны ці пры выкананні вайсковай службы (пры ўмове, што муж ці жонка не ўзялі новы шлюб), а таксама непрацуючым адзінокім інвалідам І-ІІ груп і адзінокім пажылым мінчанам права на пакрыццё фактычных выдаткаў у памеры да 5 бюджэтаў пражытковага мінімуму на рамонт кватэр, дамоў, замену сантэхнікі, газавага і электрычнага абсталявання — за выключэннем выпадкаў атрымання падобнай кампенсацыі на працягу двух папярэдніх гадоў. Гэтыя ж катэгорыі мінчан маюць права і на бясплатную ўстаноўку аўтаномных пажарных апавяшчальнікаў.

Апроч таго, гарадская праграма прадугледжвае выплату шэрагу дапамог да пенсій. У прыватнасці, для ветэранаў і інвалідаў Вялікай Айчыннай, якія атрымліваюць "грамадзянскую" пенсію і не знаходзяцца на поўным дзяржаўным забеспячэнні, а таксама для маці ці пры іх адсутнасці для бацькі вайскоўцаў, якія загінулі ці прапалі без вестак у Афганістане, іншых краінах баявых дзеянняў або пры выкананні службовых абавязкаў (пры ўмове, што маці або бацька не працуе, не займаецца прадпрымальніцтвам, не знаходзіцца на поўным дзяржаўным забеспячэнні і пры гэтым адносіцца да ветэранаў, інвалідаў, пажылых людзей), памер такой выплаты складае адну мінімальную пенсію па ўзросце, а для членаў сем'яў вайскоўцаў, партызан і падпольшчыкаў, якія загінулі ці памерлі падчас Вялікай Айчыннай і адносяцца да катэгорыі ветэранаў, інвалідаў і пажылых людзей, — 50 працэнтаў мінімальнай пенсіі па ўзросце.

Паводле гарадской праграмы, непрацуючыя ветэраны вайны, члены сем'яў вайскоўцаў, партызан і падпольшчыкаў, якія загінулі ці памерлі падчас Вялікай Айчыннай, бацькі вайскоўцаў, якія загінулі ці прапалі без вестак у Афганістане, іншых краінах баявых дзеянняў або пры выкананні службовых абавязкаў, могуць разлічваць на аплату курса псіхалагічнай рэабілітацыі ў рэабілітацыйным цэнтры, а ветэраны, інваліды і пажылыя людзі ў сем'ях вайскоўцаў, што загінулі ці прапалі без вестак у Афганістане, іншых краінах баявых дзеянняў або пры выкананні службовых абавязкаў, — на аднаразовую дапамогу для набыцця кветак на могілкі ў памеры 150 тыс. рублёў.

Плюс да таго, мінчане, якія дасягнулі 95-гадовага ўзросту, атрымліваюць пенсію ў органах па працы, занятасці і сацыяльнай абароне і якія не знаходзяцца на поўным дзяржаўным забеспячэнні, маюць права на атрыманне штомесячнай сацыяльнай дапамогі ў памеры мінімальнай пенсіі па ўзросце.

— У сталіцы наладжана рэгулярнае абследаванне ўмоў жыцця ветэранаў, адзінокіх пенсіянераў і адзінокіх інвалідаў І і ІІ груп, усе іх просьбы і пажаданні бяруцца пад кантроль, — зазначыла Ірына Дудка. — Пры гэтым падчас абмеркавання праекта сталічнага бюджэту на наступны год тэма скарачэння дадатковай падтрымкі ветэранаў вайны і асоб, якія пацярпелі ад наступстваў вайны, не ўзнімаецца. Хутчэй, наадварот: не выключана, што тут могуць быць вызначаны новыя гарантыі.

Тым часам, паведаміла Ірына Дудка, у Мінску стартаваў эксперымент па аказанні пажылым людзям і інвалідам, і ў тым ліку ветэранам і ўдзельнікам вайны, дадатковых сацыяльных паслуг з іх аплатай на ўмовах рэнты. Пры жаданні скарыстацца гэтай магчымасцю можна звярнуцца ў тэрытарыяльны цэнтр сацыяльнага абслугоўвання насельніцтва па месцы жыхарства.

Сяргей ГРЫБ.