Зямлю ў Мінскай вобласці будуць выдзяляць толькі на падрыхтаваных для індывідуальнага будаўніцтва тэрыторыях

Источник материала:

Такое рашэнне прынята ўчора на пасяджэнні Мінскага аблвыканкама, на якім разглядаліся меры па ўстараненні парушэнняў заканадаўства аб рэгістрацыі грамадзян і зямельнага заканадаўства ў Мінскай вобласці, перадае БЕЛТА.

На думку старшыні Мінаблвыканкама Барыса Батуры, гэта дасць магчымасць кантраляваць асваенне участкаў, выявіць тых, хто набыў зямлю для перапродажу і пазбегнуць самавольства ў сферы землеўпарадкавання. У раёне плануемай жылой забудовы павінна быць створана мінімальная інфраструктура: масіў абгароджаны, зроблена гравійная дарога і праведзена электрычнасць.

"Калі спачатку вызначылі б участак пад масіў індывідуальнай забудовы, зрабілі б хоць у гравійным выкананні вуліцы і далі электраэнергію, а пасля гэтага пачалі выдзяляць зямлю, тады не было б той сітуацыі, што цяпер склалася — адзін будуецца, а іншыя ўчасткі зарастаюць", — сказаў Барыс Батура, адзначыўшы, што такі прыклад існуе ў Смалявіцкім раёне.

Дзеючае зямельнае заканадаўства недасканалае, і многія прадпрымальныя грамадзяне гэтым скарысталіся. У прыватнасці, не ўрэгуляваны пытанні кансервацыі і продажу зямельных участкаў, рэгістрацыі па дагаворах найму. На ўсё гэта адказныя службы закрывалі вочы, а часта і садзейнічалі ўчыненню правапарушэнняў. Цяпер рыхтуюцца змяненні ў нарматыўна-прававыя акты, каб выключыць магчымасць махінацый.

Таксама ў Мінскай вобласці будуць прыняты меры для канфіскацыі зямельных участкаў у грамадзян, якія атрымалі іх дзякуючы фіктыўным дагаворам найму. Прынята ўжо каля 30 такіх рашэнняў, многія справы разглядаюцца ў судах. Будзе ўзмоцнены кантроль за продажам закансерваваных зямельных участкаў — сустракаюцца выпадкі, калі грамадзяне фіктыўна ўстанаўліваюць 12 працэнтаў будаўніцтва, затым рэгіструюць і прадаюць як аб'ект незавершанага будаўніцтва. Калі ў заканадаўства будуць унесены змены і ўстаноўлена 70-працэнтная гатоўнасць будынкаў для магчымасці рэалізацыі, то сітуацыя палепшыцца. Акрамя таго, на жорсткі кантроль возьмуць нямэтавае выкарыстанне зямельных участкаў.