З разлікам на субсідыю

Источник материала:

Маладыя людзі з'яўляюцца даволі частымі кліентамі цэнтраў занятасці, аднак, паколькі гэта даволі мабільная група насельніцтва, то і працу яны знаходзяць хутчэй, чым дарослыя: у сярэднім за 1,3 месяца, у той час як астатнім на гэта, як правіла, патрабуецца больш часу.

— Мы не толькі працаўладкоўваем моладзь, але і імкнёмся павысіць яе канкурэнтаздольнасць на рынку працы, — патлумачыў кансультант упраўлення палітыкі занятасці Міністэрства працы і сацыяльнай абароны Алег ТАКУН, — і ў першую чаргу за кошт павышэння прафесійнага ўзроўню. Сёння па накіраванні службы занятасці маладыя людзі могуць прайсці навучанне больш чым па 40 прафесіях — з атрыманнем стыпендый на перыяд навучання.

З агульнай колькасці беспрацоўных, якіх у краіне па выніках першага паўгоддзя налічвалася 30,7 тысячы, маладыя людзі ва ўзросце ад 16 да 29 гадоў складаюць прыблізна 37% (11,3 тысячы чалавек).

Для садзейнічання занятасці моладзі ў нас прадугледжаны шэраг спецыяльных праграм, расказаў Алег Такун. У прыватнасці, часовая занятасць моладзі, якая дапамагае школьнікам і навучэнцам уключацца ў працоўнае жыццё і з'яўляецца элементам прафарыентацыі. Тым маладым людзям, якія ўжо скончылі навучальную ўстанову, прапануецца праграма "Моладзевая практыка". Выпускнік прыходзіць у службу занятасці, спецыялісты якой ўладкоўваюць яго да наймальніка тэрмінам да 6 месяцаў для атрымання пэўных уменняў прафесійнай дзейнасці. За гэты час малады чалавек набіраецца вопыту, а служба занятасці кампенсуе наймальніку заработную плату "практыканта".

Яшчэ адным з кірункаў падтрымкі моладзі з'яўляецца садзейнічанне ў арганізацыі прадпрымальніцкай дзейнасці. Беспрацоўны малады чалавек, які дасягнуў 18-гадовага ўзросту, мае права звярнуцца ў органы па працы і сацыяльнай абароне, прад'явіць свой бізнэс-план па выбраным відзе дзейнасці і разлічваць на атрыманне фінансавай падтрымкі з боку дзяржавы. Мэтавая бязвыплатная субсідыя выдзяляецца ў памеры 11 бюджэтаў пражытковага мінімуму. Для беспрацоўных грамадзян, якія пражываюць у вёсцы, у малых гарадах і населеных пунктах з устойліва высокім узроўнем беспрацоўя, памер субсідыі складае 15 БПМ.

— Трэба ўлічваць, — дадаў кансультант упраўлення,— што практычна ў кожным рэгіёне мясцовымі выканаўчымі і распарадчымі органамі зацверджаны свой пералік прыярытэтных відаў прадпрымальніцкай дзейнасці. І, вядома, у першую чаргу субсідыя выдаецца тым грамадзянам, якія выбралі від дзейнасці, што ўваходзіць у памянёны пералік.

Інга МІНДАЛЁВА.