Раман Бродаў: "Усё ў рамках адзінай эканамічнай прасторы павінна рабіцца ў інтарэсах бізнэсу"

Источник материала:

У Міністэрстве эканомікі адбыўся брыфінг, на якім прадстаўнікі Мінэканомікі і Міністэрства па падатках і зборах расказалі журналістам, наколькі адрозніваюцца ўмовы працы для малога бізнэсу ў Расіі і Беларусі.

Як адзначыў Раман БРОДАЎ, начальнік галоўнага ўпраўлення знешняй эканамічнай палітыкі Мінэканомікі, нават калі меркаваць па звестках з рэйтынгу Dоіng Busіnеss, які складаецца Сусветным банкам, пакуль сярод краін СНД вельмі істотныя адрозненні ва ўмовах вядзення гаспадарчай дзейнасці:

— Давайце паглядзім на вопыт Еўрасаюза як на правобраз адзінай эканамічнай прасторы, да стварэння якой мы ідзём. У краінах, якія складаюць ядро ЕС, паказчыкі прастаты вядзення бізнэсу адрозніваюцца нязначна: суб'екты гаспадарання не адчуваюць розніцы ў вядзенні гаспадарчай дзейнасці на тэрыторыі гэтых краін. Бо разрыў паміж рэйтынгамі, скажам, Германіі, Аўстрыі і Францыі складае не больш за 10 пунктаў. Тое самае можна сказаць і пра асобныя паказчыкі, якія фарміруюць гэты рэйтынг. А калі казаць пра нашы краіны, то дыспрапорцыя паміж імі найбольш істотная: разрыў паміж максімальным і мінімальным месцамі ў рэйтынгу складае 55 пунктаў — дарэчы, на карысць Беларусі. А ў некаторых канкрэтных значэннях паміж намі стаяць 140 дзяржаў. І такая розніца сведчыць пра вялікую працу, якую яшчэ трэба будзе зрабіць.

Разам з тым, Раман Бродаў лічыць, што нашы суб'екты малога бізнэсу вельмі зацікаўлены ў супрацоўніцтве з расійскімі прадпрымальнікамі. Праўда, у шэрагу выпадкаў эфектыўнасць такога супрацоўніцтва невысокая:

— Возьмем, напрыклад, напрамак вытворчай кааперацыі. У нас ёсць прыклады, калі расійскія бізнэсмены прапаноўваюць беларускім партнёрам ажыццяўляць такое ўзаемадзеянне — вырабляць нейкі від прадукцыі, якую яны могуць потым выкарыстоўваць у сваім вытворчым працэсе. Беларусы могуць выканаць заказ і хутка, і з патрэбнай якасцю, і ў патрэбнай колькасці. Але сабекошт вытворчасці за кошт больш высокіх цэн, чым у РФ, на сыравіну, на энергарэсурсы, на іншыя віды камплектуючых робіць такое супрацоўніцтва недастаткова выгадным. Такім чынам, мы бачым адсутнасць роўных умоў гаспадарання для суб'ектаў прадпрымальніцкай дзейнасці.

Прадстаўнік Мінэканомікі таксама выказаў меркаванне, што беларускаму малому бізнэсу трэба больш увагі надаваць экспарту ў Расію:

— Экспарт малога бізнэсу ў Расійскую Федэрацыю менш чым на чвэрць кампенсуе той імпарт або тыя тавары, якія малы бізнэс набывае ў РФ. У гэтых мэтах неабходна наладжванне вытворчасці як новых тавараў, так і павышэнне якасці ўжо існуючых, павелічэнне аб'ёмаў узаемных інвестыцый, развіццё сумесных вытворчасцяў.

Разам з тым, у 2012 годзе ў беларускіх кампаній з'явіцца магчымасць удзельнічаць на роўных у дзяржзакупках Расіі. А гэта — гарантаваны збыт прадукцыі і гарантаваная выручка.

— У рамках адзінай эканамічнай прасторы падпісана пагадненне аб правядзенні дзяржаўных муніцыпальных закупак, якія закліканы забяспечыць нацыянальны рэжым пры ажыццяўленні дзяржзакупак Беларусі, Расіі і Казахстана з 1 студзеня 2012 года. І найбольш праблемным момантам тут з'яўляецца тое, што рэзідэнты РБ не маюць доступу да электронных аўкцыёнаў, доля якіх у Расіі з'яўляецца пераважнай.

Каб паўдзельнічаць ў гэтых аўкцыёнах, беларускім кампаніям неабходна мець на тэрыторыі Расіі сваё прадстаўніцтва — такая норма абумоўлена выкарыстаннем электронных ключоў і электронных лічбавых подпісаў. Раман Бродаў адзначыў, што такая праблема чыноўнікам вядома, і зараз вядзецца праца па забеспячэнні ў 2012 годзе роўных умоў удзелу ў дзяржзакупках. Але пры гэтым ён нагадаў, што працэс гэты двухбаковы, а значыць, Беларусь таксама адкрые для кампаній з іншых краін доступ да сваіх дзяржзакупак — такім чынам беларускім суб'ектам гаспадарання неабходна будзе ўдзельнічаць у конкурсе з канкурэнтамі з краін-партнёраў.

Раман Бродаў перакананы, што ўсё ў рамках Саюзнай дзяржавы і адзінай эканамічнай прасторы павінна рабіцца ў інтарэсах бізнэсу, паколькі ён з'яўляецца самым дакладным індыкатарам узроўню эканамічнага камфорту.

Калі ж казаць пра падаткі, то, як лічыць Ала СУНДУКОВА, начальнік упраўлення міжнароднага супрацоўніцтва Міністэрства па падатках і зборах, у Беларусі Указам Прэзідэнта № 349 ад 9 жніўня 2011 года ўстаноўлены самы высокі бар'ер для прымянення спрошчанай сістэмы падаткаабкладання.

— Гэты ўказ толькі што падпісаны, і трэба сказаць, што на прасторы СНД у нас самы высокі бар'ер для спрошчанай сістэмы падаткаабкладання — 12 мільярдаў рублёў валавай выручкі. А што тычыцца ПДВ — то гэта 3,4 мільярда валавога даходу. Такога нідзе больш няма, — сказала Ала Сундукова і прывяла прыклады іншых еўрапейскіх краін: — У Вялікабрытаніі парог для таго, каб не плаціць ПДВ, — 340 млн беларускіх рублёў (сумы пераводзіліся ў рублі па стане на сакавік 2011 года), у Швейцарыі — 310 мільёнаў, у Літве — 120 мільёнаў, ва Украіне — 112 мільёнаў, у Латвіі — 60 мільёнаў, у Харватыі — 51 мільён.

Такія меры, на думку Алы Сундуковай, з'яўляюцца заклікам да насельніцтва Беларусі развіваць сямейны бізнэс:

— Зараз падатковы ціск на малы бізнэс такі, каб гэты малы бізнэс проста нарадзіўся, каб у яго з'явілася зацікаўленасць жыць і развівацца. Мы разумеем: зараз вельмі цяжкі час, і таму, каб бізнэс выжыў, і быў падняты гэты бар'ер.

Таксама яна пракаментавала і сітуацыю са стаўкай ПДВ: прадстаўнікі бізнэс-супольнасці неаднаразова звярталі ўвагу на тое, што ў нашай краіне гэтая стаўка занадта высокая (20%), а ў Расіі і Казахстана — ніжэй (18% і 12% адпаведна).

— Што тычыцца ўскосных падаткаў, то гэта, у прынцыпе, права кожнай краіны іх уводзіць. На тое яны і называюцца ўскоснымі — яны бяруцца са спажыўца. І нашая бізнэс-супольнасць задае вельмі цікавае пытанне, якое да самога бізнэсу мае вельмі апасродкаванае дачыненне. Бо сам плацёж і сам падатак пабудаваны такім чынам, што ён праходзіць транзітам праз плацельшчыка. Плацім мы, канчатковыя спажыўцы, фізічныя асобы — усе тыя, хто купляе гатовыя тавары, выкарыстоўвае гэтыя работы і паслугі. А плацельшчыкі забіраюць гэтыя грошы і накіроўваць іх у бюджэт. Гэта падатак на спажыванне, таму памер стаўкі — 20%, 10% ці 18% — на памер прыбытку не ўплывае, сабекошт, у прынцыпе, атрымліваецца адзіны. Што тычыцца экспарту, то мы тавары ачышчаем абсалютна ад усіх ускосных падаткаў. І калі расійскія ці казахскія тавары прыходзяць да нас, то яны прыходзяць з такой стаўкай, якая дзейнічае на ўнутраным рынку.

Пры гэтым Ала Сундукова заўважыла, што калі наша краіна будзе багацейшай, то адпаведна, ускосныя падаткі будуць памяншацца.

Павел БЕРАСНЕЎ.