Адзін з сямейнікаў выбыў. Але выбыў часова

Источник материала:

Мы з мужам, дачкой і дарослым сынам займалі невялікую трохпакаёвую кватэру. У 2008-м годзе дачка з яе, можна сказаць, выехала, паступіла вучыцца (цяпер жыве і прапісана ў Мінску, у студэнцкім інтэрнаце), а да нас пераехала нявестка — жонка сына. Не так даўно ў іх нарадзіўся хлопчык, наш унук. У выніку ў нашай кватэры з улікам дачкі-студэнткі зараз прыпадае менш як 15 кв. метраў агульнай плошчы на аднаго чалавека. Ці могуць нашу сям'ю прыняць на кватэрны ўлік?

Г. П., г. Віцебск.

Згодна з арт. 30 Канстытуцыі Рэспублікі Беларусь, грамадзяне нашай краіны маюць права свабодна перамяшчацца і выбіраць месца жыхарства ў межах Рэспублікі Беларусь, пакідаць яе і бесперашкодна вяртацца назад. Пры рэалізацыі гэтага права павінна забяспечвацца канстытуцыйна гарантаванае кожнаму грамадзяніну адно з найважнейшых сацыяльна-эканамічных правоў — права на жыллё (арт. 21, 29, 48) і, у прыватнасці, захаванне жыллёвых правоў за часова выбыўшымі грамадзянамі па месцы пастаяннага пражывання.

У гэтым выпадку прапіска (рэгістрацыя) па месцы вучобы ў студэнцкім інтэрнаце носіць часовы характар (на перыяд вучобы), і факт пражывання ў гэтым інтэрнаце не з'яўляецца падставай для прыняцця грамадзяніна на ўлік асоб з патрэбай у паляпшэнні жыллёвых умоў па месцы фактычнага, але часовага пражывання (г.зн. у населеным пункце, дзе знаходзіцца навучальная ўстанова).

У той жа час па месцы жыхарства грамадзяніна (адкуль ён часова выбыў для вучобы) за ім павінны захоўвацца ўсе жыллёвыя і звязаныя з імі правы (незалежна ад наяўнасці рэгістрацыі (прапіскі), а іменна: захаванне права карыстання жыллём або права ўласнасці на яго, захаванне права знаходжання на кватэрным уліку або пастаноўкі на такі ўлік, права атрымання жылога памяшкання або дзяржаўнай падтрымкі для будаўніцтва (рэканструкцыі) або набыцця жылога памяшкання, атрыманне зямельнага ўчастка для індывідуальнага жыллёвага будаўніцтва, удзелу ў прыватызацыі жылых памяшканняў, падзеле, абмене іх, у здзелках па адчужэнні жылля і інш.

Пералічаныя правы за часова выбыўшым з ранейшага месца жыхарства грамадзянінам (у нашым выпадку — для вучобы ў іншым населеным пункце) павінны захоўвацца на ўвесь перыяд вучобы і да атрымання ім жылога памяшкання ў пастаяннае карыстанне (набыцця ва ўласнасць) у іншым населеным пункце.

Такім чынам, грамадзянін, які часова выбыў для вучобы ў іншым населеным пункце, павінен улічвацца ў складзе сям'і бацькоў пры вырашэнні пытання аб пастаноўцы гэтай сям'і на ўлік асоб з патрэбай у паляпшэнні жыллёвых умоў па месцы жыхарства пры наяўнасці падстаў, прадугледжаных Палажэннем аб парадку ўліку грамадзян, якія маюць патрэбу ў паляпшэнні жыллёвых умоў, выдзялення жылых памяшканняў дзяржаўнага жыллёвага фонду (зацверджана Указам Прэзідэнта Рэспублікі Беларусь ад 29 лістапада 2005 г. № 565). Адмова мясцовага выканаўчага і распарадчага органа ў прыняцці сям'і на кватэрны ўлік можа быць абскарджана ў судовым парадку.

Неабходна таксама адзначыць: п. 33 названага Палажэння прадугледжана, што права знаходзіцца на ўліку асоб з патрэбай у паляпшэнні жыллёвых умоў па месцы жыхарства захоўваецца, у прыватнасці, за грамадзянамі ў выпадку іх выезду на часовае пражыванне ў іншы населены пункт у сувязі з навучаннем — на працягу ўсяго часу навучання, і ў сувязі з выбыццём па размеркаванні накіраваных на працу маладых спецыялістаў — на тэрмін працы па размеркаванні.

Віктар САВІЦКІ.