Усталяваны тысячны банкамат "Беларусбанка"

Источник материала:

Гэтую падзею самі супрацоўнікі банка назвалі "алімпійскай". Бо тысяча банкаматаў — гэта бясспрэчны рэкорд у карткавым бізнэсе краіны (кожны трэці банкамат у рэспубліцы належыць "Беларусбанку"). Юбілейнае ўстройства пачало працаваць у Лошыцы (Ігуменскі тракт, 20) у будынку нядаўна адкрытага аддзялення "Беларусбанка".

Невыпадкова юбілейны банкамат дастаўся менавіта маладому мікрараёну, які актыўна засяляецца. Сёння ў Мінску ўжо дастаткова ўсталявана такіх устройстваў самаабслугоўвання, і таму бліжэйшая задача банка — насычэнне новых мікрараёнаў банкаматамі і інфакіёскамі, каб людзі маглі атрымліваць банкаўскія паслугі непасрэдна там, дзе яны жывуць.

Дарэчы, першы банкамат банкам быў усталяваны ў 1998 годзе. Яго функцыі былі абмежаваны толькі магчымасцю атрымліваць наяўныя грошы і праглядаць рэшту на рахунку. А сучасныя банкаматы нават адрозніваюцца ад тых, што былі яшчэ пяць гадоў таму. Яны маюць павышаную ступень абароненасці і дазваляюць уладальнікам пластыкавых картак здзяйсняць шырокі спектр безнаяўных аперацый: атрымліваць міні-выпіску, плаціць за мабільную сувязь, хатні тэлефон, эфірна-кабельнае тэлебачанне, доступ у інтэрнэт, імгненна пераводзіць грашовыя сродкі з адной карткі на іншую. Пашырэнне функцый фактычна ператварае банкамат у міні-аддзяленне банка, якое дазваляе размеркаваць кліенцкія патокі, паменшыць нагрузкі на банкаўскіх работнікаў і пазбавіцца ад чэргаў. Акрамя таго, банкамат робіць паслугі банка больш даступнымі, бо карыстацца банкаўскімі серверамі можна кругласутачна. Таму не дзіва, што сёння аб'ёмы грашовых сродкаў, якія атрымліваюць кліенты ў банкаматах, у пяць разоў перавышаюць аб'ёмы выдачы наяўных грошай у аддзяленнях.

Нядаўна банк пачаў устанаўліваць новыя віды банкаматаў з функцыяй Саsh-іn, а па вуліцы Якубоўскага, побач з заводам святлопрыбораў, дзе пераважна працуюць людзі з парушэннем зроку, з'явіўся такі банкамат, якім могуць карыстацца людзі, якія дрэнна бачаць. Гэтае ўстройства аснашчана кнопкамі, якія дазваляюць навобмацак знайсці патрэбную клавішу. Людзі з аслабленым зрокам змогуць разабраць больш выразныя надпісы на кантрасным экране. Акрамя таго, аперацыі на банкамаце суправаджаюцца галасавой падтрымкай — чалавек чуе падказку, як яму дзейнічаць.

— Адной са стратэгічных задач банка з'яўляецца давядзенне банкаўскіх паслуг максімальна блізка для нашых кліентаў, каб гэта было зручна і даступна ў любы час, — заўважыў намеснік дырэктара разліковага цэнтра пластыкавых карт ААТ "АСБ Беларусбанк" Генадзь Серы. — Акрамя таго, што мы ўстанаўліваем банкаматы, банк сёння валодае дастаткова шырокай сеткай інфакіёскаў, якія больш арыентаваны на тое, каб кліенты маглі здзяйсняць безнаяўныя плацяжы (у адрозненне ад банкаматаў у інфакіёсках спектр такіх плацяжоў значна шырэйшы). Акрамя таго, зараз мы актыўна развіваем дыстанцыйныя банкаўскія сэрвісы: інтэрнэт-банкінг, Мабільны банк, СМС-банк. Гэтыя паслугі па меры іх развіцця дазваляюць нашым кліентам здзяйсняць банкаўскія аперацыі, не выходзячы з дома.

Між іншым, у свеце зараз працуе каля двух з паловай мільёнаў банкаматаў. А самы першы банкамат з'явіўся ў 1967 годзе ў Англіі. Адзін з кліентаў банка, які на хвіліну спазніўся ў банк, каб атрымаць грошы, прыдумаў банкамат, а за аснову узяў апарат, які выдаваў шакаладкі. З першых банкаматаў грошы здымаліся пры дапамозе ваўчара, які напачатку трэба было закупіць у банку. Штуршком для развіцця банкаматнага бізнэсу паслужыла з'яўленне ў 1976—77 гадах пластыкавых картак. Сёння банкаматы моцна мадэрнізуюцца. У некаторых краінах ужо ўсталяваны біяметрычныя банкаматы, для карыстання якімі не патрэбна картак: разумная машына вызначае кліента па адбітках пальца ці сятчатцы вока.

Я пацікавілася ў кіраўніка тэхнічнага ўпраўлення Анатоля Чарняціна, ці не з'явяцца ў бліжэйшы час біяметрычныя банкаматы і ў Беларусі. Па яго словах, такое пытанне ўжо разглядалася. Але, каб увесці такую паслугу, неабходная моцная мадэрнізацыя працэсінгавага цэнтра і банкаматаў, што даволі дорага. Таму ўстанаўліваць біяметрычныя банкаматы пакуль не плануецца.

— Якія б парады вы далі кліентам, што карыстаюцца банкаматамі? — пацікавілася я ў Генадзя Серага.

— Быць уважлівымі. Уважліва сачыць за паведамленнем на экране, гукавым суправаджэннем. Не мітусіцца, калі нехта адцягне ўвагу кліента, — праз 30-40 секунд банкамат можа забраць картку. Устройства павінна гэта зрабіць у мэтах бяспекі кліента. А калі раптам з чалавекам нешта здарылася, — напрыклад, стала дрэнна? Нельга аддаваць картку іншым людзям ці гаварыць свой пін-код. Яна — як ваш уласны кашалёк, але з адной асаблівасцю: згубіўшы картку, вы не згубіце грошы.

З'яўляючыся бясспрэчным лідарам на карткавым рынку Беларусі, банк будзе працягваць развіваць сэрвісы самаабслугоўвання. Сёлета ў рэспубліцы плануецца ўсталяваць яшчэ каля 30 банкаматаў, 10 з якіх — у сталіцы.

Алена Дзядзюля.