Маладзечанцы ўратаваліся ад трыхінелёзу

Маладзечанскія паляўнічыя здабылі ў Пастаўскім раёне (Віцебская вобласць) дзіка. Жывёла аказалася заражанай лічынкамі трыхінел.

Пра гэта 23 лістапада паведаміў Маладзечанскі занальны цэнтр гігіены і эпідэміялогіі.

Тры маладзечанцы ўпалявалі дзіка 19 лістапада. Мяса аддалі на экспертызу ў Маладзечанскую міжрайветлабараторыю – яно аказалася заражанае. Да гэтага мяса ніхто не ўжываў – чакалі вынікаў экспертызы.

Туша жывёліны была знішчаная. Як паведамляе цэнтр гігіены, любая тэрмічная апрацоўка мяса была бессэнсоўная.

Напрыканцы кастрычніка некалькі маладзечанцаў заразіліся трыхінелёзам. Некаторыя з іх былі шпіталізаваныя. Заражэнне звязваюць таксама з ужываннем мяса дзіка.