ХРОНІКА АПОШНІХ ПАДЗЕЙ

Источник материала:

Нямецкая паліцыя разагнала акцыю пратэсту эколагаў

Нямецкая паліцыя выкарыстала вадамёты, слязісты газ і дубінкі супраць актывістаў экалагічных рухаў, якія пратэстуюць супраць увозу ў іх краіну ядзерных адходаў з Францыі, паведамляе Thе Lосаl.

У адказ у паліцэйскіх паляцелі петарды і бутэлькі з фарбай. Хтосьці з дэманстрантаў распыліў у бок вартавых парадку перачны газ. Падчас сутыкненняў чатыры актывісты былі арыштаваны, пяцёра — паранены. Таксама пацярпелі восем паліцэйскіх.

Брытанскія банкі рыхтуюцца да краху еўра і еўразоны

Банкі Вялікабрытаніі не могуць ігнараваць магчымасць выхаду з еўразоны асобных краін, ім неабходна распрацаваць план дзеянняў у надзвычайных абставінах, сказаў кіраўнік банкаўскага аддзела брытанскага Упраўлення па рэгуляванні фінансавай дзейнасці Эндру Бейлі.

Нягледзячы на тое, што брытанскія банкі маюць на балансе нязначны аб'ём дзяржаблігацый краін еўразоны, яны павінны быць гатовы да горшага, адзначыў Бейлі. "Мы не можам дазволіць сабе расслабіцца ў гэтым пытанні. Як надзорны орган, мы хацелі б убачыць план крэдытных арганізацый краіны на выпадак неспадзяваных наступстваў еўрапейскага пазыковага крызісу", — сказаў прадстаўнік рэгулятара. Пры гэтым Бейлі адзначыў, што яго заява не з'яўляецца прагнозам развіцця сітуацыі ў еўразоне.

Кіраўнік украінскага Нацбанка анансаваў "мяккую дэвальвацыю" грыўні

Старшыня Нацыянальнага банка Украіны Сяргей Арбузаў не выключае дэвальвацыі нацыянальнай валюты ў наступным годзе, аднак запэўнівае, што рэзкай яна не будзе.

"Ваганні могуць быць, паколькі мы залежым ад стану плацежнага балансу. Калі ён палепшыцца, то курс будзе ўмацоўвацца, калі будзе пагаршацца — будзе дэвальвацыя. Але ў любым выпадку гэты працэс не будзе рэзкім", — сказаў Арбузаў украінскай газеце "Сёння". Кіраўнік Нацбанка Украіны пры гэтым адзначыў, што запасы валюты на рахунках банкаў набліжаюцца да 10 млрд долараў. "І гэта небывалая лічба. Усе чакаюць глыбокую дэвальвацыю і хочуць на гэтым зарабіць. Але я хачу сказаць, што яны гэтага не дачакаюцца. Плацежны баланс досыць пазітыўны, яго сярэднямесячны прафіцыт складае каля 100 млн долараў. Таму я думаю, што да канца года курсу нічога не пагражае", — заявіў Арбузаў.

У Расіі ўводзяць уклады без права адклікання

Мінфін РФ падрыхтаваў законапраект, які дазволіць банкам прапанаваць кліентам не толькі тэрміновыя ўклады і ўклады да запатрабавання, але і новыя — уклады без права адклікання. Банкі змогуць замацоўваць у дагаворах з укладчыкамі ўмову, што да заканчэння вызначанага тэрміну грошы кліенту вяртацца не будуць. Згодна з дзейсным заканадаўствам, ва ўкладчыка пакуль ёсць права вярнуць свае сродкі па першым патрабаванні — нават калі гаворка ідзе пра тэрміновы ўклад.

Яйкі — ключ да захавання памяці

Рацыён, багаты на вітамін В4, выратуе ваш мозг ад старэння, устанавілі навукоўцы з Бостанскага ўніверсітэта. Гэты вітамін можна знайсці ў яйках, курыцы, марской рыбе, бабовых, паведамляе Thе Dаіlу Mаіl.

Даследчыкі высветлілі, што людзі, якія спажываюць В4, лепш спраўляліся з тэстамі на памяць і мелі менш змен у мозгу, звязаных з дэменцыяй. Доктар Рода Ау падкрэслівае: рацыён аказвае прамы ўплыў на стан чалавека. Трэба сказаць, раней навукоўцы даказалі, што так званая Міжземнаморская дыета, якая ўключае рыбу, гародніну, аліўкавы алей, таксама аказвае ахоўны эфект. У цэлым адмыслоўцы рэкамендуюць мужчынам спажываць 550 міліграмаў вітаміну В4 у дзень, а жанчынам — 425 міліграмаў гэтага вітаміну.

Теги: Курсы валют