На прылаўках Слоніма ў дэфіцыце свіныя ногі

—Мы вяртаемся ў савецкія часы? Для таго каб купіць таннейшыя прадукты, такія як ногі, вушы, хвасты і г. д., патрэбны знаёмыя ў гандлі. Іначай ніяк не дакупішся. Усё прадаецца з-пад прылаўка. Што будзе далей? — sms-паведамленне такога зместу прыйшло на рэдакцыйны тэлефон “Газеты Слонімскай”.

Для таго каб пацвердзіць ці абвергнуць словы нашага чытача, у нядзелю карэспандэнт пацікавілася ў слонімскіх крамах наяўнасцю свіных ног, хвастоў ды вушэй. Як высветлілася, ногі на халадзец сапраўды сёння сталі дэфіцытам, і звычайна іх можна набыць у дні прывозу, і тое, калі пашанцуе, бо гэты тавар хутка разбіраюць. Праўда, у адным з магазінаў карэспандэнт амаль натрапіла на патрэбны тавар…

—Свіных ног у продажы ў нас няма, бо мясакамбінат іх нам не прывозіць наогул, — сказалі карэспандэнту ў магазіне мясных паўфабрыкатаў.

—Прывозяць ногі, але цяпер яны адсутнічаюць, — зазначылі ў другім магазіне. — Прыходзьце ў аўторак ці чацвер, у дні прывозу. Але іх хутка разбіраюць, за дзве гадзіны можа не стаць, як і таннай каўбасы, — параіла прадаўшчыца.

—Што значыць “вам вельмі патрэбны ногі”, калі ў нас іх няма? — з раздражненнем папракнула прадавец у трэцім магазіне. — Мы іх не хаваем, адразу выкладваем на вітрыну.

Ногі ў гэтым магазіне, як і ў папярэдніх, раскупляюць хутка, і, як адзначыла прадавец, іх даюць усяго па 10-12 кілаграмаў на прывоз.

—Ногі? Зараз вынесу, — услужліва ўсхапілася са свайго месца знаёмая прадаўшчыца ў чацвёртым магазіне, на мясных вітрынах якога тых самых ног не было і блізка. — Раскупляюць іх хутка. Бабулькі каравуляць ледзь не з раніцы, бяруць па дзве ўпакоўкі, — тлумачыла знаёмая.

Праўда, ісці па тавар ёй не давялося з-за непатрэбнасці ў ім. Аднак прадаўшчыца запэўніла:

—Звяртайцеся, пакінем, калі трэба.

Пасля гэтага адчуванне, што вяртаемся ў савецкія часы, калі таргавалі з-пад прылаўка, у аўтара гэтых радкоў сапраўды з’явілася. Праўда, толькі часткова. Бо ў той час у магазінах што-што, а ногі дэфіцытам не былі і ляжалі — разам са свінымі галовамі — у продажы свабодна.

Чаму гэтага тавару не стала ў наш час, карэспандэнт пацікавілася ў начальніка аддзела маркетынгу Слонімскага мясакамбіната Святланы Апановіч.

—Справа ў тым, што апошнім часам паступленне свіней на забой зменшылася, — адказала Святлана Апановіч. — Так, калі раней наш камбінат прымаў штодзень па 500-600 галоў свіней, то зараз — толькі па 250-300 галоў. Адпаведна зменшылася колькасць свіных субпрадуктаў і павялічыўся попыт на ялавічныя субпрадукты.

Свіныя вушы, як высветлілася з размовы, у продаж амаль не паступаюць. Яны ідуць на выраб мясных рулетаў і ўваходзяць у склад набору субпрадуктаў “Арыгінальны”.

Разам з тым з усіх пунктаў дастаўкі прадукцыі Слонімскага мясакамбіната па Гродзенскай вобласці, а іх больш за 400, Слонім, як зазначыла Святлана Аляксандраўна, знаходзіцца ў прыярытэце. Так, у гэты паня-дзелак, 28 лістапада, згодна з яе словамі, усе 370 кілаграмаў свіных ног і 75 кілаграмаў ялавічных хвастоў былі адпраўлены менавіта ў магазіны Слоніма. І ў сярэднім штодзень па 400 кілаграмаў ног накіроўваецца ў магазіны нашага горада. Праўда, як адзначыла Святлана Аляксандраўна, магазіны робяць заяўку на 200 кілаграмаў, а атрымліваюць у дні завозу толькі па 40-50 кілаграмаў.

—Прадукцыя гэтая танная, таму і карыстаецца павышаным попытам, — падвяла выснову ў гутарцы субяседніца.

Вядома, такога попыту ў Слоніме не будзе, напрыклад, на каўбасы вышэйшага гатунку, цана на якія вагаецца ад 55 да 100 тысяч і вышэй. Бо той дарагой каўбасы, у адрозненне ад ног, шараговы слонімскі пенсіянер купіць на сваю пенсію каля 10 кілаграмаў. А ў некага на тыя ж 10 кілаграмаў можа не хапіць і заработнай платы, не тое што пенсіі.

Разам з тым, як сцвярджае афіцыйная статыстыка, са студзеня да канца кастрычніка гэтага года продаж мяса, у тым ліку мяса свойскай птушкі і мясных прадуктаў, вырас у нашай краіне на 15%. І гэта нягледзячы на тое, што мяса даражэе ледзь не штомесяц і зарплаты за цэнамі не заўсёды паспяваюць. (Праўда, колькі таго мяса ў тых мясных прадуктах — сардэльках, сасісках, варанай каўбасе, таннейшых за само мяса ў тры, а то і ў пяць разоў, — можна толькі здагадвацца).

…У нядзелю адна з наведвальніц мяснога магазіна — згорбленая, не па сезону лёгка апранутая бабулька — папрасіла ў прадаўшчыцы таннейшых костачак па 2 940 рублёў. Ёй на тры тысячы ўзважылі кілаграм амаль дачыста паскрэбеных касцей (больш у наяўнасці не было). Акрамя голых костак, старэнькая больш нічога не купіла.
У статыстыку, вядома, гэтая слонімская бабулька таксама трапіла.

Што пачым у магазіне

Ялавічына 75 160 руб.
Свініна 51 960 – 65 490 руб.
Курыца 24 440 руб.
Каўбаса “Папулярная” ліверная 7 040 руб.
Каўбаса “Усходняя” крывяная 4 090 руб.
Каўбаса бессартавая “Сялянская” 17 590 руб.
Каўбаса бессартавая “Чайная” 24 180 руб.
Каўбаса вяленая “Вясковая” 75 900 руб.
Каўбаса “Мотальскі прысмак” 96 600 руб.