На Еўрабачанне Ад Расіі паедзе Пугачова...

Источник материала:

Праўда, не адна, а ў кампаніі з яшчэ пяццю сяброўкамі — удзельніцамі фальклорнага калектыву "Буранаўскія бабулі". Менавіта гэтая творчая суполка атрымала сенсацыйную перамогу ў фінале сёлетняга расійскага адбору на "Еўрабачанне", абышоўшы 24 іншых артыстаў, сярод якіх быў дуэт Дзімы Білана (пераможца "Еўрабачання-2008") і Юліі Волкавай (экс-"ТаТу", 3-е месца на "Еўрабачанні-2003").

Спачатку калектыў з Малапургінскага раёна Рэспублікі Удмуртыя спяваў толькі народныя песні, але з 2008 года бабулькі наважыліся на смелы эксперымент — выконваць расійскія і сусветныя хіты ў перакладзе на ўдмурцкую мову. Цяпер жа ўдмурцкія пенсіянеркі з дзвюхмоўнай песняй "Party For Everybody" здолелі пераканаць як тэлегледачоў, так і прафесіяналаў з журы ў тым, што Расія на конкурсе калі і не пераможа, то дакладна вызначыцца і запомніцца.

На сцэну "Еўрабачання" ў Баку выйдуць шэсць "Буранаўскіх бабулек": Вольга Туктарава — наймаладзейшая ўдзельніца (ёй усяго 43 гады), а таксама Граня Байсарава (63 гады), Галіна Конева (73), Кацярына Шкляева і Валянціна Пятчанка (па 74) і найменшая па росце, але ці не самая знакамітая з "бабулек" Наталля Пугачова (76 гадоў). Дарэчы, Вялікабрытанію на конкурсе сёлета прадставіць чалавек-легенда, уладальнік 63 "залатых" і 24 "платынавых" запісаў, адзначаны зоркай на Алеі зорак у Галівудзе, — 75-гадовы Энгельберт Хампердынк.

...А ад Арменіі — ніхто

Днямі гэтая краіна афіцыйна паведаміла ў Еўрапейскі вяшчальны саюз, што здымае сваю заяўку на ўдзел у конкурсе. Нагодай для гэтага стала гібель армянскага салдата тэрміновай службы, якія быў смяротна паранены азербайджанскім снайперам на мяжы дзвюх дзяржаў.

Вікторыя ЦЕЛЯШУК.