Застольная

Источник материала:

Жыццё людское складваецца як песня. Які характар — такі і лёс, а пад настрой — і мелодыю гэткую ж падбіраем. І гучыць рознагалосы хор, ляцяць-пераліваюцца вясёлыя і сумныя, пяшчотныя і раздольныя песні. А кожнаму так хочацца, каб і музыкай душа песцілася, і словы ладком цягнуліся.

Глыбокай вобразнасцю поўніцца песня "Застольная". Па-народнаму разгорнутае апісанне навакольнай прасторы, узмоцненае запытамі ў запеве ("Ой, нашто, нашто ліпа ссечана?" і "Для каго-каго прыхаваная ўся дзявочая ласка?"), перадае супярэчлівую напружанасць рэчаіснасці. Не суджана ночцы і вечару заставацца трывалай параю, ды і намерам дня ніколі не здзейсніцца. І толькі згадкі ў прыпеве пра месячык ("Ясны месячык ходзіць" і "Месяц хмарку праводзіць") падаюць надзею на жыццёвую спагаду, палюбоўнае паразуменне... Мо і часова суладнае? Хутказменнае?

Задушэўна-светлую песню "Застольная" напісалі полацкая паэтка Надзея Салодкая і Ізмаіл Капланаў, выдатны саліст-інструменталіст, які напрыканцы мінулага стагоддзя звярнуўся да кампазітарскай творчасці і вельмі плённа выявіўся ў песенным жанры. Гэты вакальны твор заняў прыкметнае месца на беларускай эстрадзе, увайшоў у рэпертуар Дзяржаўнага ансамбля народнай музыкі "Свята". Новую песню дружна падхапіў наш спеўны люд.

Верш Надзеі Салодкай

Ой, нашто, нашто ліпа ссечана?

Доля долю шукае.

Ночка з вечарам,

           ночка з вечарам

Да дзянніцы блукае.

Засвяцілася неба золакам,

Ночку дзень запрыкмеціў.

Рана-раненька сінім сполахам

Косы чорныя ўквеціў.

Прыпеў:

Піце, госцейкі, ешце, госцейкі,

Віно хмельнае бродзіць.

Ці па беражку, ці па мосціку

Ясны месячык ходзіць.

Ноч-хусціначка, ноч-прасціначка

Тонкім шоўкам спадала.

Ой, цвіла-была сіраціначкай,

Чаго ж любай не стала?

Ані мілаю, ні каханаю,

Ні расцвіўшаю краскай...

Для каго-каго прыхаваная

Ўся дзявочая ласка?

Прыпеў:

Піце, госцейкі, ешце, госцейкі,

Віно хмельнае бродзіць.

Ці па беражку, ці па мосціку

Месяц хмарку праводзіць.

Апошнія два радкі ў кожнай страфе запеву і ў прыпеве выконваюцца двойчы, а ўвесь прыпеў паўтараецца.

Падрыхтаваў Міхась ШАВЫРКІН

¢