Летнія канікулы маладзечанскіх акцёраў

Источник материала:

Артысты Мінскага абласнога драматычнага тэатра ў канцы ліпеня сыходзяць у адпачынак. Папулярныя дзеячы сцэны падзяліліся сваімі планамі на лета.

Вядома, што ў працоўны час артысты дэманструюць розныя спектаклі. Ёсць выступленні масавыя, прызначаныя для шырокай публікі, часцей за ўсё яны маюць гумарыстычны характар, суправаджаюцца вясёлай музыкай.
Існуюць таксама “элітарныя” спектаклі, пастаўленыя для аўдыторыі, якая “смакуе” кожны рух, кожны жэст таго, хто іграе. Гэта і “Паляванне на пацукоў”, і “Забава”.

Шмат людзей збірае “Камедыя” па п’есе Уладзіміра Рудава, якая выконваецца ў тэатры з 1993 года ўжо пятым пакаленнем артыстаў. За мяжу са сваімі знакамітымі мона-спектаклямі выязджае Алег Чэчанеў, які валодае вытанчаным майстэрствам прымушаць публіку сябе слухаць. Нярэдкімі з’яўляюцца і прадстаўленні для дзяцей. Яркія, маляўнічыя, пацешныя і смешныя, з абавязковымі элементамі гульні і зносін, яны прыцягваюць маленькіх гледачоў.

– Мы таксама часта ездзім па гарадах і вёсках, у лагеры і санаторыі. Бывалі ў Салігорску, Нясвіжы, Вілейцы, Валожыне, Дзяржынску, – расказвае загадчык літаратурнай часткі тэатра Аляксандр Пыцько. – А вось лета – гэта “мёртвы сезон”. Усе акцёры сыходзяць у адпачынак, таму ў тэатры для гледачоў ад ліпеня па жнівень нічога не плануецца.
Але ў гэты час трупа жыве насычаным жыццём. Хтосьці ездзіць на здымкі серыялаў, у лёсе некаторых нярэдкімі з’яўляюцца частыя гастролі. А нехта кожны дзень рэпеціруе новую ролю ў чарговым спектаклі. Напрыклад, Алена Рахмангулава, папулярная актрыса, майстар сцэны, якая працуе ў тэатры ўжо 21 год.

– Праца – гэта маё жыццё. Натуральна, не лёгкае, але я не скарджуся: тэатральная кар’ера складваецца паспяхова. Рэпецірую дома, разбіраю п’есы, вучу тэкст. Калі выпадае адыграць ролю з партнёрам, мы “вучым нагамі”: ходзім па сцэне, прывыкаем.
Зразумела, што не ва ўсіх творчых людзей адпачынкам з’яўляецца праца. Здараюцца паездкі на курорты і проста на дачу, некаторыя акцёры ўвесь час знаходзяцца ў горадзе, сустракаюцца са шматлікімі гасцямі. А ў іншых атрымоўваецца сумяшчаць усё разам:

– Я люблю глядзець футбол, планую з 27 ліпеня прысвяціць сябе прагляду алімпіяды па тэлевізары, – смяецца Сяргей Карзей, майстар сцэны, і дадае:

– У апошні час захапіўся тэнісам. Калі-нікалі збіраю грыбы ў вёсцы. Люблю класічную літаратуру, а некаторы час таму, рыхтуючыся да літаратурна-музычнай вечарыны “Паэзіі чароўная краса”, амаль цалкам перачытаў Янку Купалу і Якуба Коласа. Лірыка-эпічная паэма "Новая зямля" кранула мяне да слёз.

Наогул, артысты нічым не адрозніваюцца ад іншых людзей. Нават калі яны аказваюцца на гастролях – паводзяць сябе звычайна. Ядуць бутэрброды, п’юць гарбату з тэрмаса. Ходзяць у крамы, кафэ. Вядома, летняя выязная дзейнасць – рэч цяжкая і стомная, таму змораныя акцёры не заўсёды высыпаюцца. Часам прыходзіцца працаваць ва неўладкаваных залах, сталовых і нават спартзалах. Хоць тэатр – гэта “цэласная істота”, якая мае патрэбу не толькі ва ўвазе гледача, але і ў эстэтычным афармленні пляцоўкі, на якой прыходзіцца працаваць.

І трэба памятаць, што толькі ва ўладзе трупы стварыць на сцэне такую атмасферу, якая выкліча захапленне, моцныя эмоцыі і застанецца ў памяці.
Таццяна КАСЬЯН.

Фота з архіва "РГ".