Сябар мой, ліфт

Источник материала:

Чаму некаторыя людзі ставяцца да ліфта, як дзікуны?

Высотны дом нельга ўявіць без ліфта. Асабліва гэта адчуваецца тады, калі пад'ёмная машына чамусьці не працуе, і даводзіцца паднімацца па лесвіцы пешшу. Калі да ліфта ставіцца з пашанай — то ён і праслужыць доўгія гады. Але, на жаль, існуюць людзі, для якіх гэтае правіла — пусты гук. І няма розніцы, хто тут "пастараўся", хуліган-падлетак альбо дарослы чалавек, бо вынік адзін — ліфт псуецца. Вандал заўсёды разумее, на што ён ідзе і якія будуць наступствы.

Яшчэ адно набалелае пытанне — замена старых зношаных ліфтаў. У рознай ступені яно датычыцца шматпавярховак, пабудаваных да 1987 года ўключна. Пра гэта карэспандэнт "Звязды" пагутарыў з намеснікам начальніка вытворчага аддзела ААТ "Ліфтсэрвіс" Віталём РУСЕЦКІМ.

Цікава:

üСамы стары пасажырскі ліфт, які знаходзіцца на абслугоўванні ААТ "Ліфтсэрвіс", размешчаны па вуліцы Данілы Сердзіча, 3. Ён пачаў вазіць людзей яшчэ ў далёкім 1971 годзе. Але, па словах Віталя Русецкага, у лістападзе пад'ёмную машыну чакае тэхнічнае дыягнаставанне, таму далейшы лёс "рэкардсмена" пакуль невядомы.

üСамыя высотныя пасажырскія ліфты ўсталяваны ў дамах 82 і 84 па праспекце Дзяржынскага. Яны давязуць да 25 паверха.

üА самая мініяцюрная пад'ёмная машына знаходзіцца на вуліцы Кірава, 1 — у доме з гадзіннікам насупраць чыгуначнага вакзала. Яна здольна падняць за раз не больш за трох чалавек.

Інфармацыя для роздуму:

Закон не прадугледжвае літасці да вандалаў. Артыкул 10.9 Кодэкса аб адміністратыўных правапарушэннях прадугледжвае штраф памерам да 50 базавых велічынь. На сёння гэтая сума складае 5 млн рублёў. Куды больш жорсткі артыкул 218 Крымінальнага Кодэкса. Калі шкода прычынена ў буйных памерах, то вандал рызыкуе пазбавіцца волі на тэрмін ад 3 да 10 гадоў.

— Ліфтавая гаспадарка ў сталіцы і вобласці падзелена паміж дзвюма арганізацыямі: нашай і ААТ "Белліфт". У Мінску мы абслугоўваем ліфты, якія знаходзяцца ў Маскоўскім, Кастрычніцкім і Фрунзенскім раёнах. Па Мінскай вобласці — 29 населеных пунктаў, сярод якіх такія буйныя гарады, як Слуцк, Маладзечна, Салігорск.

— Сапраўдны біч для ліфтаў — гэта вандалізм. Наколькі востра зараз стаіць гэта праблема?

— Мы працуем у цесным кантакце з органамі ўнутраных спраў. Напрыклад, быў выпадак, калі ў ліфце засела п'яная кампанія. Дзверы кабіны адчынялі ў прысутнасці міліцыі — ці мала што яны маглі ўтварыць у кабіне. За час працы давялося шмат чаго пабачыць — і адарваныя "з мясам" панелі, і падпаленыя плафоны, і размаляваныя сцены... Але так і не зразумеў аднаго: чаму ж некаторыя людзі ставяцца да ліфта, як дзікуны? Яны быццам жывуць па прынцыпе: калі не маё — то магу рабіць, што хачу. Але ж потым самі і ездзяць на ліфтах з такой "наскальнай творчасцю". За 8 месяцаў 2012 года ўжо зарэгістравана 40 выпадкаў вандалізму.

Некалькі гадоў таму, калі я працаваў прарабам у Маскоўскім раёне сталіцы, невядомыя абдзіралі з дзвярэй ліфтаў у жылых дамах алюмініевыя пласціны. У выніку ўтвараліся велізарныя дзіркі і эксплуатаваць пад'ёмныя машыны было нельга. І вось аднойчы паступіў сігнал ад прыбіральшчыцы дома што ў кабіне ліфта раздаюцца гукі, быццам нехта штосьці спрабуе ададраць. Адразу на месца падзей выехала міліцыя. Аказалася, што кабіну спрабавалі раскурочыць некалькі няпоўнагадовых. У выніку іх бацькі заплацілі буйны штраф.

У пазамінулым дзесяцігоддзі масавыя крадзяжы абсталявання адбываліся таму, што ліфты былі падключаны да састарэлай сістэмы дыспетчарскага кантролю. Не падаваўся сігнал аб несанкцыянаваным пранікненні пабочных асоб у машыннае аддзяленне. Гэтыя хібы выпраўлены на новых ліфтах, а на старых пад'ёмніках паступова выпраўляюцца. Да таго ж старыя паступова адпраўляюцца на замену. На гэтым шляху ёсць толькі адна перашкода — недахоп сродкаў. Але мы робім усё магчымае, каб зладзеі беспакарана не квапіліся на абсталяванне.

— Вы ўзгадалі пра замену. Нарматыўны тэрмін службы ліфта — 25 гадоў. Што адбываецца з машынай, калі яна дасягнула гэтага ўзросту?

— Ліфт чакае тэхнічнае дыягнаставанне. Дазвол на яго далейшую эксплуатацыю выдае незалежны эксперт. Але гэты дазвол дзейнічае не больш за тры гады — у залежнасці ад стану ліфта. Пасля працэдура паўтараецца. Калі ж эксперт выносіць рэкамендацыю аб замене ліфта — эксплуатацыя адразу ж спыняецца. Але баяцца старой машыны не трэба, таму што арганізацыя, якая яе абслугоўвае, робіць усё, каб забяспечваць бяспечную эксплуатацыю. Каб паездка была менавіта такой, трэба выконваць простыя правілы карыстання. Калі ж адбылася нейкая няштатная сітуацыя — трэба звязацца з дыспетчарам...

— І як доўга працягваецца замена?

— Па-першае, гэта залежыць ад спецыфікі ліфта. Па-другое, на тэрмін замены ўплывае колькасць паверхаў. Як правіла, звычайна ліфт мяняюць на працягу ад аднаго да двух месяцаў. Пры гэтым жылыя дамы маюць прыярытэт.

— А як дорага замена абыходзіцца?

— Гэтая сума вызначаецца ў час правядзення тэндара. Яго выйграе тая арганізацыя, якая прапануе найменшыя выдаткі. Стандартны пасажырскі ліфт, які разлічаны на 9 паверхаў, каштуе 140-150 мільёнаў рублёў. Але да гэтай сумы неабходна дадаць кошт мантажных работ. Ён вагаецца ў гэтых жа межах. Дарэчы, работы выконваюцца з мінімальнай рэнтабельнасцю.

— Што хутчэй: тэмпы замены ліфтаў альбо тэмпы старэння?

— На сёння хуткасць старэння ліфтаў вышэйшая. Гэта звязана з тым, што 25 гадоў таму актыўна забудоўваліся вялізныя мікрараёны Кунцаўшчына, Захад, Паўднёвы Захад, Малінаўка. Некалькі лічбаў — усяго мы абслугоўваем 8887 ліфтаў, з якіх 7510 — пасажырскія. З іх больш за 25 гадоў адпрацавала 2081 машына, у тым ліку тэрмін эксплуатацыі 760 пераваліў за 30 гадоў.

Валяр'ян ШКЛЕННІК.