Тыраж — 1 экзэмпляр

Источник материала:

"7 цудаў вёскі Галавінцы" — такую назву мае адна з незвычайных кніг, прадстаўленых у Гомельскай цэнтральнай гарадской бібліятэцы. У сваёй кніжцы дзеці расказалі, што адрознівае іх вёску ад іншых. А гэта і майстэрства мясцовых ткачых, і цудоўныя краявіды, і багатая гісторыя. Адметнай гэтую кніжку, як і іншыя, зрабілі матэрыялы, якія выкарыстоўваліся пры "друкаванні".

"Фаліянты" тут вязаныя, вышываныя, плеценыя, вылепленыя... Ёсць акварэль, бацік, ткацтва, саломапляценне і шмат чаго яшчэ. Экспазіцыю склалі работы школьнікаў ад 10 да 16 гадоў, якія займаюцца ў творчых гуртках і сталі ўдзельнікамі абласнога конкурсу дзіцячага мастацкага і дэкаратыўна-прыкладнага мастацтва "Цуд, імя якому — кніга" ў намінацыі "Аб'ёмная кніга". На конкурс, абвешчаны ў Год кнігі, з усёй Гомельскай вобласці было прадстаўлена больш за сто аб'ёмных тамоў. Вылучылі 34 лепшых. Што датычыцца тэм — у асноўным гэта гісторыя, літаратура, краязнаўства і прырода роднага краю. Гэтыя кнігі маюць не толькі эстэтычную, але і літаратурную каштоўнасць. На старонках выданняў, зробленых рукамі дзяцей, — беларускія быліны, ілюстрацыі да вядомых народных казак, а таксама шэдэўры класікі — у незвычайным выкананні. Таксама ў экспазіцыі ёсць кнігі, якія распавядаюць пра гісторыю ўзнікнення кнігадрукавання.

Ірына АСТАШКЕВІЧ.