Казачныя метамарфозы беларускіх зорак

Источник материала:

Чатырнаццаць медыяперсон Беларусі на працягу трох месяцаў пераўвасабляліся ў казачных герояў з сусветна вядомых казак. Вынікам гэтых працоўных прыгод стаў сацыяльны фотапраект "Чытай і ажыццяўляй", які быў задуманы і ажыццёўлены дзіцячымі бібліятэкамі горада Мінска пры падтрымцы ўпраўлення культуры Мінгарвыканкама і Нацыянальнай школы прыгажосці.

Пры дапамозе грыму і касцюмаў беларускія зоркі ажывілі герояў пяці казак. Самымі вясёлымі вобразамі, якія задалі пазітыўны настрой і надалі смеласці на далейшыя здымкі, сталі героі "Вострава Скарбаў" Р.  Стывенсана (спявак Андрусь Такінданг і бітбоксеры Алег Амбарцумян, Сяргей Унтэрберг, Арсеній Кугейка, Павел Аглушэвіч). Гюнеш можна ўбачыць Шамаханскай царыцай з "Казкі пра залатога пеўніка" А. Пушкіна, трыа ў складзе Лесі Кодуш, Славы Нагорнага і Паліны Паланейчык ужывалася ў вобразы герояў "Залатога ключыка" А. Талстога. Ілья Міцько з гурта "Лепрыконсы" ператварыўся ў Карлсана А. Ліндгрэн. Таксама на суд гледачоў прадстаўлена версія "Трох мушкецёраў" А. Дзюма, у якой галоўнымі героямі сталі "Міс-Беларусь-2010" Вікторыя Раховіч разам з хлопцамі з гурта Lіtеsоund.

<І>— Казкі робяць нас дабрэйшымі. Таму, калі мне прапанавалі сфатаграфавацца ў вобразе Шамаханскай царыцы, я, не раздумваючы, згадзілася, — падзялілася ўдзельніца праекта Гюнеш. — Я на працягу многіх гадоў працую са сваёй камандай візажыстаў, а тут давялося супрацоўнічаць з новай камандай. Спачатку мне было страшнавата, бо ўсходні макіяж вельмі спецыфічны, але калі ўбачыла сваё адлюстраванне, мне спадабалася. Гэта быў для мяне самы яркі момант у гэтым праекце.

А Паліна Паланейчык расказала, як ужывалася ў вобраз Бураціна: "У мяне ёсць два маленькія браты, таму пераўвасабляецца ў казачных герояў даводзіцца часта. Удзельнічаючы ў гэтым фотапраекце, увайсці ў вобраз было нескладана. Праўда, на твары з'явілася нешта новае — я кажу пра доўгі нос. Вельмі дапамаглі вялізная кніга і ключ, якія мне прынеслі. Глядзела на сябе ў люстэрка і разумела, што гэта я, толькі ўжо ў вобразе".

Падзялілася сваімі ўражаннямі і беларуская прыгажуня Вікторыя Раховіч: "Прыемна, што мяне запрасілі паўдзельнічаць у гэтым праекце. Я па натуры чалавек мяккі, а вось мой вобраз мілэдзі патрабаваў ператварыцца ў ракавую жанчыну, якая пляла пры двары інтрыгі. Гэта быў новы вопыт для мяне. Але праца ў атмасферы, дзе фатограф увесь час дубляваў выказванні Міхаіла Баярскага, а побач былі хлопцы з Lіtеsоund, дазволіла ўжыцца ў вобраз".

А вось Андрусь Такінданг, які ўжо не ўпершыню супрацоўнічаў з дзіцячымі бібліятэкамі, сказаў: "Не заўсёды выпадае магчымасць пабыць героямі тых кніжак, якія чытаў у дзяцінстве. Мне далі шаблю, пісталет, надзелі пірацкі капялюш, і гэта было здорава. Таксама для мяне важна, што гэты праект звёў мяне з новымі сябрамі".

На выстаўцы-прэзентацыі, што прайшла напярэдадні Дня бібліятэк, былі прадстаўлены фотаздымкі не толькі ўвасобленых літаратурных вобразаў, але і некаторых момантаў творчага працэсу. Пяць асноўных фотакарцін ужо растыражыраваны ў фармаце кішэнных каляндарыкаў і хутка з'явяцца ў выглядзе плакатаў, каб маленькія чытачы і іх бацькі, бабулі з дзядулямі, мелі магчымасць, завітаўшы ў бібліятэку, пранікнуцца казачным настроем.

Алена ДРАПКО