Нядаўна ў многіх рэспубліканскіх газетах надрукавалі фота з выявай распрацаванага турыстычнага брэнда Мінска.

Источник материала:

Віктар Нікалайкін, старшыня Віцебскага гарадскога выканаўчага камітэта:

Думаю, калі гаварыць аб брэндзе Віцебска, напэўна, брэнд, па-першае, гэта сам Віцебск з яго больш як тысячагадовай гісторыяй. І ўсё, што засталося з гісторыі, трэба захоўваць — у прыватнасці помнікі архітэктуры. Стараемся вярнуць Віцебску былы выгляд. Вось аднавілі з нуля Свята-Успенскі сабор і іншыя аб'екты дойлідства. Віцебск вядомы сваім унікальным рэльефам — з узвышшамі і нізінамі горада, вядомы рэкамі (Лучоса, Віцьба, Заходняя Дзвіна).

Па-другое, напэўна, брэнд — нашы землякі Шагал, Пэн, а таксама Малевіч, які працаваў у Віцебску, Рэпін, дача якога захавалася, знакамітая мастацкая школа. Нідзе такога няма. Сёння ўжо ва ўсім свеце добра ведаюць, што Шагал нарадзіўся ў Віцебску, і горад гэта беларускі, а раней жа многія лічылі што Шагал — французскі мастак. І едуць у Віцебск, каб убачыць горад, які натхняў Майстра. 3 мільёны долараў у год зарабляем на паслугах турызму. У вышэйпералічаным бачу брэнд. А проста так і стварыць брэнд, напэўна, не атрымаецца.

  Цімафей Фірсаў, менеджар:

Здабытак Віцебшчыны — гэта лён. Яго кветкі намаляваны на гербе нашай краіны. Віцебск можа і павінен стаць сусветнай сталіцай лёну. Буцікі па ўсім горадзе, у якіх прадаюцца самыя модныя вырабы з віцебскага лёну самых вядомых брэндаў (Армані, Ніна Рычы, Х'юга Бос і г.д.). Па ўсім горадзе праходзяць модныя паказы, віцебскія прыгажуні дэманструюць ільняныя рэчы. А ў бюджэт горада адлічваюцца добрыя падаткі, за грошы ад якіх лён ўвекавечваюць ў бронзе... Па-мойму, усё гэта было б нядрэнна!

  Ларыса Кучынская, сакратар міжгародняга вузла электрасувязі:

Ведаеце, складана адказаць так адразу. Можа, тое, што звязана з рэлігіяй, бо кажуць у мінулым вельмі шмат было ў нашым горадзе цэркваў, сабораў, сінагог... Я думаю, што людзям цікава было б даведацца пра гэта больш падрабязна. А наогул я вельмі люблю наш горад, і спыніцца на нейкім адным вельмі складана.

Вядома, неад'емная "частка" нашага горада — гэта міжнародны фестываль мастацтваў "Славянскі базар у Віцебску" і яго слаўная гісторыя, якая налічвае вось ужо больш як дваццаць гадоў. Гэта таксама цікава. Ды і людзі ў Віцебску нарадзіліся, жылі і працавалі вельмі цікавыя і вядомыя на ўвесь свет.

Аляксандр ПУКШАНСКІ.