Прагаласуйце за ўдзел беларусаў у фінале адзінаборстваў К-1

Источник материала:

Карпарацыя К-1 афіцыйна абвясціла даты сваіх фінальных турніраў. Спаборніцтвы K-1 WGР Fіnаl 16 гэтага года стартуюць другога і трэцяга кастрычніка ў Сеуле.

«Спачатку на рынг выйдуць 16 байцоў суперцяжкай вагавай катэгорыі, на наступны дзень — такая ж колькасць атлетаў вагой да 70 кг (так званае К-1 MАХ), — паведамляе прэс-служба карпарацыі.

Што тычыцца суперцяжаў, то арганізатары ўжо адабралі 10 наймацнейшых байцоў. Засталося абвясціць яшчэ шасцярых. Рэч у тым, што сёлета сарвалася некалькі рэгіянальных Гран-пры, пераможцы якіх і павінны былі прыняць удзел у фінале. З гэтай прычыны арганізатары склалі спіс з 21 прэтэндэнта, сярод якіх аж тры беларусы.

Гэта тайбаксёры Забіт Самедаў і Аляксей Ігнашоў, а таксама былы чэмпіён свету па баях без правілаў Андрэй Арлоўскі. Калі на афіцыйным сайце К-1 за беларусаў прагаласуе належная колькасць фанатаў, то ўсе яны маюць шанец трапіць у сусветны фінал.

Распавядзём пра нашых хлопцаў.

Мінчук Забіт Самедаў (клуб «Патрыёт») на сёння ўжо зрабіў імя ў К-1. Прымаў удзел у леташнім фінале, дзе прайграў віцэ-чэмпіёну свету. У свой час Забіт стаў чэмпіёнам Еўропы па кікбоксінгу сярод прафесіяналаў (75 кг) і чэмпіёнам свету па муай-тай (86 кг). Сярод усіх байцоў К-1 Забіт адзін з найлягчэйшых (яго сённяшняя вага — 90 кг, рост — 184 см). Для параўнання — чэмпіён планеты мінулага года Сэм Шылт мае рост 220 см, а вагу — 120 кг.

— Але я гатовы і хачу змагацца з любым байцом, — пацвердзіў свой намер Забіт у інтэрв’ю «Звяздзе». — Нядаўна я правёў плённыя зборы ў Балгарыі і знаходжуся ў добрай форме. Вельмі спадзяюся, што балельшчыкі прагаласуюць за мяне на сайце К-1. І тады я не падвяду.

Другі беларускі прэтэндэнт — Аляксей Ігнашоў (115 кг). Яго называюць «Чырвоны скарпіён». У свой час Ігнашоў быў, відаць, галоўнай зоркай К-1 і самым вядомым беларускім спартоўцам у свеце. Ён перамагаў практычна ўсіх чэмпіёнаў планеты па К-1 розных гадоў (Сэма Шылта, Рэмі Баньяскі, Пітэра Аэрца), але сам так і не змог атрымаць сусветную карону. У нядаўнім інтэрв’ю Ігнашоў распавёў пра прычыны страчаных мараў — злоўжыванне алкаголем. Цяпер «Чырвоны скарпіён» жыве ў Новай Зеландыі, але выступае пад беларускім сцягам. Сёлета Аляксей спрабаваў кваліфікавацца ў фінал К-1, але на адным з рэгіянальных турніраў атрымаў прыкрую траўму калена. Што ж, з’явіўся яшчэ адзін шанец трапіць у фінал.

Трэці беларускі прэтэндэнт — Андрэй «Пітбуль» Арлоўскі (100 кг, жыве ў Чыкага, але выступае пад беларускім сцягам). Ён былы чэмпіён свету па змяшаных адзінаборствах у версіі UFС. Праўда, за апошні год Андрэй прайграў тры паядынкі запар, і наўрад ці мае ахвоту выступаць у спаборніцтвах К-1. Прынамсі, на яго афіцыйным сайце пра фанацкае галасаванне няма ніякай інфармацыі.

Як галасаваць?

Старонка з прозвішчамі байцоў размешчана на афіцыйным сайце карпарацыі К-1. Пакідаць свой голас можна толькі на карысць аднаго байца. За суткі можна прагаласаваць толькі адзін раз.

Адзіны беларускі баец, які гарантаваў сабе ўдзел у сусветным фінале — Віталь Гуркоў (клуб «Патрыёт», 70 кг). Увесну Віталь перамог на ўсходнееўрапейскім Гран-прыК-1 MАХ, што праходзіла ў Мінску. Пасля гістарычнага турніру Віталь нечакана даў беларускамоўнае інтэрв’ю нашаму тэлебачанню. І тым самым стаў першым спартоўцам, які публічна выступіў на роднай мове.

Цікава, што ў рынг Гуркоў часта выходзіць пад мелодыі беларускага фальклору. Віталь — лідар нацыянальнай зборнай па муай-тай, сяміразовы чэмпіён свету. Аднак у спаборніцтвах К-1 ён не можа ўжываць свае галоўныя каронкі — барацьбу ў стойцы і ўдары локцямі. Таму турнір у Мінску ён выйграў з цяжкасцю, без яркіх накаўтаў, «на жылах».

Днямі з’явілася інфармацыя пра тое, што першым супернікам Віталя Гуркова ў сусветным фінале хутчэй за ўсё стане… леташні чэмпіён свету Джорджыа Петрасян (Італія). Выходзіць, што беларуса вось так адразу кідаюць «пад танкі»?

— Хто б ні быў супернік, Віталь — гэта ад прыроды пераможца, мы разлічваем на максімальны вынік, — паведаміў «Звяздзе» Дзмітрый Пясецкі, трэнер Гуркова. — Калі б не было добрых шанцаў перамагчы, мы б не ўдзельнічалі ў турніры. Адзначу, што канчатковае рашэнне наконт суперніка пакуль не прынятае.

Спецыялісты падкрэсліваюць, што Віталь Гуркоў — прадстаўнік плыні інтэлектуальнага двубою. Пры гэтым можа моцна ўдарыць. Віталя параўноўваюць з мудрым военачальнікам. Сам баец распавядаў журналістам, што ўзорам вайсковай мудрасці і магутнасці для яго з’яўляецца Вялікі князь Вітаўт.