"Шахцёру" — "Барселона", "Рэалу" — "Тотэнхэм"

Источник материала:

У чацвер вызначыліся чвэрцьфіналісты Лігі Еўропы. І калі ў 1/4 Лігі чэмпіёнаў прабілася аж тры англійскія клубы, то ў такую ж стадыю Лігі Еўропы выйшлі тры партугальскія каманды. Гэта лісабонская "Бенфіка", "Порту" і "Брага". З постсавецкай прасторы, дзе на стадыі плэй-оф было аж восем камандаў, у тым ліку і наш БАТЭ, засталіся ўсяго дзве — кіеўскае "Дынама" і маскоўскі "Спартак".

Лісабонская "Бефіка" ўнічыю (1:1) згуляла ў другім матчы з "Пары Сен-Жэрмен" і па суме двух матчаў ідзе далей, а супернік БАТЭ па плэй-оф выбывае з турніру. Яшчэ адзін супернік БАТЭ па групавой стадыі, кіеўскае "Дынама", выбіла з турніру аднаго з фаварытаў — англійскі "Манчэстар Сіці". Кіяўляне ў гасцях прайгралі 0:1, але да гэтага дома выйгралі 2:0. Яшчэ адзін англійскі клуб, "Ліверпуль", з турніру таксама выбыў, прайграўшы партугальскай "Бразе" (0:0, 0:1).

Расійскі ЦСКА выбіў з розыгрышу "Порту", які з лікам 2:1 перайграў масквічоў дома. Санкт-Пецярбургскі "Зеніт" быў блізкі да выхаду ў наступную стадыю: пасля першага тайма з "Твентэ" расіяне вялі 2:0 і мелі шанцы адыграцца пасля выязнога паражэння (0:3), але больш забіць так і не змаглі — далей ідзе "Твентэ". І толькі маскоўскі "Спартак" здолеў пераадолець бар'ер 1/8 — галандскі "Аякс" быў разгромлены ў Маскве 3:0. "Глазга Рэйджарс" мінімальна саступіў ПСВ 0:1, і галандскі клуб праходзіць у 1/4. Гэтак жа як і іспанскі "Вільярэал", які перайграў нямецкі "Баер" — 2:1.

Учора адбылося і лёсаванне чвэрцьфіналаў Лігі чэмпіёнаў і Лігі Еўропы. У самым прэстыжным еўрапейскім турніры "Шахцёр" згуляе з "Барселонай", "МЮ" сустрэнецца з "Чэлсі", "Інтэр" — з "Шальке", "Тотэнхэм" будзе супрацьстаяць "Рэалу". У Лізе Еўропы вызначыліся наступныя пары: "Порту" — "Спартак", "Бенфіка" — ПСВ, "Вільярэал" — "Твентэ", "Брага" — "Дынама" (Кіеў). Чвэрцьфінальныя матчы Лігі чэмпіёнаў адбудуцца 5 і 6 красавіка, матчы ў адказ — 12 і 13 красавіка. 7 і 14 красавіка пройдуць паядынкі чвэрцьфіналаў Лігі Еўропы.

Алена КРАВЕЦ.