Тры раёны, пяць школ, сем відаў спорту

Источник материала:

Выхаванец ашмянскай спартыўнай школы Андрэй Барбашынскі стаў алімпійскім чэмпіёнам па гандболе ва ўзросце 22 гадоў.

З пачаткам новага навучальнага года ў бацькоў узнікае пытанне: чым заняць дзяцей у вольны ад вучобы час? На дапамогу прыходзяць разнастайныя гурткі і секцыі, у тым ліку спартыўныя.

У Астравецкім, Ашмянскім і Смаргонскім раёнах Гродзенскай вобласці функцыянуюць пяць дзіцяча-юнацкіх спартыўных школ (ДЮСШ). У гэтых навучальных установах развіваецца сем відаў спорту. Сярод іх ёсць камандныя віды: футбол, баскетбол і гандбол. Лёгкая атлетыка – адзіны від, якім можна займацца ў кожным з раёнаў.

Найбольш аўтарытэтная з гэтых школ, вядома, смаргонская СДЮШАР. Хаця б па той простай прычыне, што ў сваёй назве мае словы “алімпійскі рэзерв”. І недарма, бо сярод яе выхаванцаў некалькі ўдзельнікаў Алімпійскіх гульняў, напрыклад, баскетбалістка Юлія Рыцікава (Дурэйка). Яшчэ СДЮШАР адметная тым, што тут развіваецца адразу тры віды спорту. Акрамя баскетбола – барацьба дзюдо і цяжкая атлетыка.

У мінулым навучальным годзе тут займалася больш за паўтысячы (557) дзяцей і падлеткаў. Па выніках агляду-конкурсу лепшым трэнерам быў прызнаны дырэктар установы, баскетбольны спецыяліст Валеры Юрчанка. Наступным стаў таксама вядомы спецыяліст, прадстаўнік барацьбы Аляксандр Вахавяк.

У Смаргоні функцыянуюць яшчэ дзве спартыўныя школы. Адна з іх развівае выключна футбол. Другая, якая адносіцца да структуры прафсаюзаў, – развівае выключна лёгкую атлетыку.

У ашмянскай ДЮСШ перавага аддаецца гандболу і лёгкай атлетыцы. Па вясне тут было 432 дзіцяці. Працуе ў школе заслужаны трэнер Беларусі Віктар Рамулевіч. Ён атрымаў ганаровае званне за падрыхтоўку алімпійскага чэмпіёна 1992 года ў складзе аб’яднанай зборнай СНД Андрэя Барбашынскага.

Астравецкая ДЮСШ, акрамя лёгкай атлетыкі, развівае яшчэ бокс. У спецыялізаванай секцыі займаюцца 388 вучняў. Выхаванцы трэнера па боксе Аляксея Маргужа за апошні час станавіліся пераможцамі спаборніцтваў рэспубліканскага ўзроўню амаль ва ўсіх узроставых групах.

Сяргей ГАЙКОВІЧ.

Фота MST.BY.