Павышаная стыпендыя — не для ўсiх «чарнобыльцаў»?

25.08.2009 21:17 — |

Размер текста:: A; A; A

Источник материала:

Надзея НІКАЛАЕВА

Паважаная рэдакцыя! Я — студэнтка Вiцебскага дзяржаўнага унiверсiтэта iмя П.М. Машэрава, дзе навучаюся на платнай аснове. Да паступлення ва унiверсiтэт пражывала ў вёсцы Багданаўка Лунiнецкага раёна, якая адносiцца да тэрыторый радыеактыўнага забруджвання. Дапамажыце даведацца, цi належаць мне нейкiя «чарнобыльскiя» выплаты, якiя атрымлiваюць, напрыклад, студэнты-бюджэтнiкi.

М. Мялешка, в. Багданаўка, Лунiнецкi раён.

У Камiтэце па праблемах наступстваў катастрофы на Чарнобыльскай АЭС пры Савеце Мiнiстраў РБ нам пацвердзiлi, што вёска Багданаўка, адкуль родам наша чытачка, уваходзiць у дзеючы на сённяшнi дзень «Пералiк населеных пунктаў i аб’ектаў, якiя знаходзяцца ў зоне пражывання з перыядычным радыяцыйным кантролем». Таму яе жыхары аўтаматычна трапляюць пад дзеянне Закона Рэспублiкi Беларусь «Аб сацыяльнай абароне грамадзян, якiя пацярпелi ад катастрофы на Чарнобыльскай АЭС». Згодна з артыкулам 25 гэтага закона iм гарантуецца паступленне па-за конкурсам у вышэйшыя, сярэднiя спецыяльныя i прафесiйна-тэхнiчныя навучальныя ўстановы, а таксама на курсы для прафесiйнага навучання з прадастаўленнем ва ўсiх выпадках iнтэрната на час вучобы. Прыём на падрыхтоўчыя аддзяленнi пры вышэйшых навучальных установах праводзiцца незалежна ад наяўнасцi месцаў i таксама з абавязковым прадастаўленнем iнтэрната.

Да таго ж асобы, што трапляюць пад дзеянне «чарнобыльскага» закона, маюць права на стыпендыю, павялiчаную на 50 працэнтаў у параўнаннi з дзяржаўнай стыпендыяй. Падставай для выплаты павышанай стыпендыi служыць даведка з месца жыхарства студэнта. Але паколькi наша чытачка не з’яўляецца студэнткай бюджэтнай формы навучання i, адпаведна, не атрымлiвае стыпендыi, на яе гэта палажэнне закона не пашыраецца.