Дробных банкаў стане менш?..

Источник материала:

Фiнансы

— Прааналiзаваўшы дзейнасць банкаў, зарэгiстраваных на тэрыторыi свабодных эканамiчных зон (СЭЗ), Нацыянальны банк прыйшоў да высновы, што эфектыўнасць iх функцыянавання, выкананне задач па прыцягненню замежных iнвестыцый i развiццё эканомiкi СЭЗаў стрымлiваецца недастатковым узроўнем капiталiзацыi гэтых банкаў, — гаворыць начальнiк упраўлення iнфармацыi галоўнага банка краiны Анатоль ДРАЗДОЎ. — Справа ў тым, што памер капiталу з’яўляецца вызначальнай велiчынёй маштабу дзейнасцi банка.

— Умоўна кажучы, банк з уласнымi сродкамi ў 500 тысяч еўра наўрад цi здольны развiвацца...

— Дынамiчнае развiццё банкаў — рэзiдэнтаў свабодных эканамiчных зон, пашырэнне спектра аказваемых iмi паслуг i, адпаведна, павелiчэнне клiенцкай базы i аб’ёмаў аперацый магчымыя толькi пры актыўным нарошчваннi гэтымi банкамi ўласнага капiталу, у тым лiку i шляхам прыцягнення прамых iнвестыцый з-за мяжы. Вось у сувязi з гэтым на апошнiм пасяджэннi праўлення Нацыянальнага банка i былi ўнесены змяненнi ў Правiлы стварэння i рэгулявання дзейнасцi банкаў на тэрыторыi СЭЗаў рэспублiкi.

Як падкрэслiлi ва ўпраўленнi iнфармацыi Нацбанка, змяненнi ў першую чаргу прадугледжваюць адмену льгот па мiнiмальнаму памеру статутнага фонду i ўласных сродкаў (капiталу) для банкаў — рэзiдэнтаў СЭЗ. Гэта значыць, што цяпер банкi, якiя зноў рэгiструюцца на тэрыторыi СЭЗ, будуць атрымлiваць лiцэнзii на ажыццяўленнне аперацый на агульных умовах. У той жа час яны змогуць функцыянаваць без лiцэнзiйных абмежаванняў кола контрагентаў. Што ж датычыцца дзеючых банкаў — рэзiдэнтаў СЭЗ, то, з улiкам патрабаванняў Iнвестыцыйнага кодэкса Беларусi, iм устаноўлены пяцiгадовы тэрмiн нарошчвання ўласных сродкаў з моманту iх рэгiстрацыi. За гэты час апошнiя банкi павiнны давесцi свой капiтал да агульнаўстаноўленых памераў, гэта значыць да сумы, эквiвалентнай 5 мiльёнам еўра для дзеючага банка, а для банка, якi мае лiцэнзiю на прыцягненне ва ўклады сродкаў фiзiчных асоб, — да сумы, эквiвалентнай 10 мiльёнам еўра.

Як адзначаюць у Нацбанку, па меры нарошчвання ўласнага капiталу да ўстаноўленага памеру банкам — рэзiдэнтам СЭЗ будуць выдадзены лiцэнзii на ажыццяўленне банкаўскiх аперацый агульнаўстаноўленага ўзору, з моманту атрымання якiх рэгуляванне iх дзейнасцi будзе ажыццяўляцца ў агульным парадку, прадугледжаным для банкаў — рэзiдэнтаў Беларусi, без эканамiчных iльгот i абмежаванняў, устаноўленых Правiламi стварэння i рэгулявання дзейнасцi банкаў на тэрыторыi свабодных эканамiчных зон нашай краiны.