«О, як соладка сэрцу малiцца...»

Источник материала:

МАЛАДЗIК

Гэтае пытанне мы i задалi мастацкаму кiраўнiку фестывалю Мiхаiлу ФIНБЕРГУ. I яму было пра што расказаць:

— Мне прыемна, што гэты фестываль мы праводзiм ужо дзесяты год. Прыемна, што ён жыве, i як бы нi было няпроста яго арганiзоўваць, нi горад Маладзечна, нi Дзяржаўны канцэртны аркестр не адмаўляюцца ад гэтай iдэi. Бо якiя яшчэ песнi павiнны гучаць на гэтай зямлi, калi не тыя, якiя тут ствараюцца? Маладзечанскi фестываль яшчэ паказвае i прыклад павагi да беларускай мовы, бо ўсе песнi, вершы, словы тут гучаць толькi па-беларуску. I не сакрэт, што калi прыклад паказваюць любiмыя артысты, аўтарытэтныя асобы, то i звычайныя людзi падтрымлiваюць iх.

Падрыхтоўку да гэтага фестывалю ў Дзяржаўным канцэртным аркестры пачалi яшчэ летась у вераснi. I нездарма. Бо сёлета ў Маладзечна прыедзе 850 удзельнiкаў, сярод iх кампазiтары, паэты, спевакi i музыканты. А ўвогуле ў фестывальных праграмах прагучаць 282 творы беларускiх аўтараў. Гэта асаблiва важна для кампазiтараў, бо музыка не павiнна ляжаць на палiцах у выглядзе нотных запiсаў. Яна павiнна гучаць.

Так, упершыню на Нацыянальным фестывалi беларускай песнi i паэзii будзе гучаць камерная музыка. Асобны канцэрт арганiзатары збiраюцца прысвяцiць Агiнскаму, аўтару бессмяротнага паланэза «Развiтанне з радзiмай». Гэты канцэрт у праграму трапiў таксама невыпадкова. Бо маёнтак Агiнскiх Залессе, дзе было створана вельмi шмат розных твораў, знаходзiцца непадалёк ад Маладзечна. А ў самiм горадзе нядаўна з’явiўся помнiк кампазiтару. Агiнскаму ўсё ж пашчасцiла — яго музыка гучала i была папулярная ў розных краiнах Еўропы яшчэ пры яго жыццi. Сучасныя беларускiя кампазiтары вельмi рады, калi iх творы гучаць у Беларусi. Можа дзеля гэтага кампазiтар Эдуард Зарыцкi з iмпэтам напiсаў цыкл песень на вершы Караткевiча? Дзяржаўны канцэртны аркестр працягвае праграму паводле твораў Караткевiча.

Увогуле 18 прэм’ер песень абяцае нам сёлета мастацкi кiраўнiк фестывалю Мiхаiл Фiнберг. А калi вярнуцца да лёсу нашых сучасных кампазiтараў, то «Маладзечна-2003» для iх — проста аддушына. Песнi 55 кампазiтараў прагучаць сёлета ў розных праграмах.

— Тыя, хто сачыў за папярэднiмi фестывалямi, ведаюць пераможцаў конкурсаў, якiя адбывалiся ў iх рамках, — працягвае гутарку Мiхаiл Фiнберг. — Многiя з тых, каго адзначала журы раней, сёння паспяхова працуюць на сцэне, i iх цяпершнi ўзровень можна будзе ацанiць. Яны таксама будуць спяваць. Але мы прадставiм новыя iмёны. Яны з’явiлiся падчас конкурсу, якi мы праводзiлi напярэдаднi фестывалю, але пераможцаў прадставiм i будзем вiншаваць у Маладзечне. Далейшы шлях у музыцы будзе залежаць ужо толькi ад iх самiх. Тым больш, што ёсць беларускiя прыклады сапраўды паспяховай творчасцi. Мiнiстэрства культуры сёлета заснавала прыз iмя Уладзiмiра Мулявiна. Прыз будзе ўпершыню ўручаны сёлета на Нацыянальным фестывалi беларускай песнi i паэзii.

За фестывальнымi падзеямi сачыце на нашым сайце ў Iнтэрнэце: html:www.zvyazda.minsk.by