Чаму пры разлiках «выпадаюць» асобныя месяцы?

Источник материала:

З СВК «Ардашы» Смаргонскага раёна на «гарачую лiнiю» газеты каля двух тыдняў таму вяскоўцы ўжо звярталiся. «Грошы за чэрвень-лiпень аддалi, за верасень выплацiлi лiтаральна праз тры днi пасля вашай публiкацыi, дзякуй. Але жнiвень чамусьцi прапусцiлi, хаця ў гэтым месяцы падчас уборачных работ людзi зарабiлi больш, чым звычайна. Увогуле ў гаспадарцы ўкараняюць нейкi дзiўны спосаб разлiку. Калгаснае малако запiсваюць на вяскоўца — нiбы як здачу ад прыватнiка. Яго забiрае малаказборшчык, i грошы мы атрымлiваем у сельскiм Савеце. Усё б нiчога, падавалася б, толькi радуйся, але той надой складае зусiм мiзэрную лiчбу, i нават пры нашых невялiкiх заробках канчатковага разлiку давядзецца ўсiм работнiкам чакаць вельмi доўга». Яшчэ нам расказалi, што ў гаспадарцы пад снегам засталiся i бульба, i лён, i кукуруза, i нават збожжавыя. Вядома, гэтыя факты патрабуюць праверкi, таму мы чакаем афiцыйнага рэагавання райвыканкама.

З вёскi Харомцы Акцябрскага раёна нам паведамiлi, што ў мясцовым саўгасе «Парэчча» дзiцячыя дапамогi за лiпень i жнiвень аддалi, а за чэрвень — не. Паводле слоў заяўнiкаў, за апошнi месяц лета не разлiчылiся з механiзатарамi, а таксама з тымi, хто працаваў па дагаворах на камбайнах. Як i ў першым выпадку, сумы за гэты месяц у вяскоўцаў набягаюць куды больш прыстойныя, чым у iншы час.

P. S. Усе iмёны заяўнiкаў у рэдакцыi маюцца.