Беларускiя спажыўцы вызначылi лепшыя прадукты

Источник материала:

Ясi сваё

Сёлета галоўнай навiной конкурсу стала рашэнне аргкамiтэта змянiць лагатып. На заклiк «Прадукт года шукае новы твар» у першым туры было даслана 218 работ, 1500 чалавек узялi ўдзел у адкрытым галасаваннi. Па вынiках экспертызы вырашана было правесцi другi, «запрашальны» тур, у якiм возьмуць удзел толькi прафесiянальныя дызайнеры.

Адметнасцю Дзён конкурсу, якiя праходзiлi з 15 лiстапада па 10 снежня гэтага года, была iдэя здаровага харчавання ў нацыянальных традыцыях. У рамках Дзён «Прадукту года» прайшоў прэс-тур «Бабулiны прысмакi» ў вёску Дышляды Дзяржынскага раёна, прысвечаны кухнi беларускай глыбiнкi. Падхапiў эстафету рэстаран «Камянiца», якi прадставiў кухню i традыцыi Вялiкага княства Лiтоўскага. Заключным мерапрыемствам стала прадстаўленне рэстаранам «Акропаль» кухнi народаў свету — Грэцыi, Iталii, Францыi, Мексiкi, Германii, Японii, краiн Азii. Паводле слоў каардынатара конкурсу Вольгi Кардаш, заключны дзень конкурсу адлюстраваў iдэю арганiзатараў аб тым, што «культура харчавання — гэта частка культуры любога народа, геаграфiчна вызначаная i гiстарычна абумоўленая». Аргкамiтэт «Прадукту года» плануе не толькi прытрымлiвацца iснуючых традыцый, але i развiваць iх пад эгiдай конкурсу.

Што да пераможцаў, то, напрыклад, першыя месцы ў сваiх намiнацыях i адпаведны знак «Прадукт года-2005» на маркiроўку заваявалi: хлеб «Нарачанскi», дзiцячае харчаванне «Малыш», чыпсы «Анега», шакаладныя цукеркi «Камунарка» i батончыкi «Спартак», сокi «Джой», мiнеральная вада «Мiнская», гарэлка «Крышталь», пiва «Крынiца», рыбныя вырабы «Мацiас» («Санта Брэмар»), марожанае «Топ», тварожныя дэсерты «101 зерне», згушчонка Глыбоцкага малочнакансервавага камбiната, плаўлены сыр «Дружба», пельменi «Ваўкавыскiя» i г.д. Былi вызначаны таксама пераможцы сярод харчовых прадуктаў расiйскай i замежнай вытворчасцi.

У 2005 годзе спажыўцы свой выбар зрабiлi. А ўжо ў студзенi 2006 года пачнецца падрыхтоўка да конкурсу «Прадукт года-2006», i ў вытворцаў з’явiцца новы шанц пацвердзiць, што яны прапануюць толькi самае лепшае.