Суперпапулярныя лазнi

Источник материала:

Сёлета ў рэшце рэшт i я ( па праўдзе кажучы, не самы гарачы прыхiльнiк сухой i, тым больш, вiльготнай пары) вырашыў далучыцца да ўсенароднай традыцыi абавязкова наведваць лазню 31 снежня. Нават «падбухторыў» траiх сваiх сябрукоў, каб усё было дакладна як у «культавай» камедыi. Аднак, каб усё было так проста...

За два днi да паходу ў лазню «ўзброiўся» самым тоўстым, якi быў у рэдакцыi, тэлефонным даведнiкам i пачаў набiраць нумары, каб «забранiраваць» сабе месца на 31 снежня ў якой-небудзь сталiчнай лазнi. Напачатку тэлефанаваў у самыя шыкоўныя сауны, але там мне паведамiлi, што я спазнiўся як мiнiмум на месяц, i параiлi разгледзець больш сцiплыя варыянты ў звычайных гарадскiх лазнях. Нiчога iншага не заставалася, як прыслухацца да парады прафесiяналаў. Аднак мне зноў не пашанцавала. Абзванiўшы прыкладна тузiн лазняў, я знайшоў толькi два вольныя месцы, ад якiх, праўда, прыйшлося адмовiцца. I справа зусiм не ў кошце паслугi, хоць цэны i не сказаць каб памяркоўныя: нумар «люкс» на 2 гадзiны каштаваў адпаведна 55 тысяч 250 рублёў i 47 тысяч 720 рублёў. У рэшце рэшт, я быў гатоў пайсцi i на такiя выдаткi дзеля таго, каб далучыцца да «лазневага буму». Але калi на другiм канцы тэлефоннага проваду мне паведамiлi, што вольныя месцы засталiся толькi на 7 гадзiн 30 хвiлiн i на 23 гадзiны, жаданне падтрымаць усенародную традыцыю неяк знiкла само па сабе. На такiя ахвяры не згадзiлiся пайсцi i мае хаўруснiкi. Прыйшлося адмовiцца. Хоць шанц усё ж наведаць 31 снежня лазню яшчэ застаўся. Спагадлiвы адмiнiстратар адной з такiх устаноў параiла паспрабаваць трапiць у лазню ў парадку жывой чаргi. Гарантый, што час у чарзе будзе патрачаны не марна, вядома, нiхто не даў, бо жадаючых падтрымаць традыцыю ў агульнай зале не менш, а наадварот, значна больш, чым аматараў нумароў «люкс». Тым не менш, надзея, як кажуць, памiрае апошняй.

Так што я ўсё ж пайду 31 снежня ў лазню. Вось толькi цi ўдасца памыцца — дакладна не ведаю.