Наша сяброўства традыцыйнае

Источник материала:

Супрацоўніцтва

Роўна 14 гадоў таму былi ўстаноўлены дыпламатычныя сувязi памiж КНР i Беларуссю. Зараз супрацоўнiцтва нашых краiн iдзе практычна ва ўсiх сферах — у эканомiцы, абароне, медыцыне, адукацыi, культуры, турызме. Абедзьве дзяржавы грунтуюць свае ўзаемаадносiны на прынцыпах палiтычнага ўзаемадаверу. Рэспублiкi абараняюць агульныя iнтарэсы i на мiжнароднай арэне. У тым лiку падтрымлiваюць адну пазiцыю ў напрамку рэфармавання структуры ААН.

Што тычыцца эканомiкi, то для ўсяго свету несумненна, што за апошнiя дзесяцiгоддзi Кiтай здолеў зрабiць моцны рывок наперад. Сакрэт «кiтайскага цуду» мае шмат складаемых. Адно з iх — правiльнае размяшчэнне рознага вiду iнвестыцый.

Урад Кiтая надае вялiкае значэнне пашырэнню гандлёва-эканамiчных сувязяў з Беларуссю. Выдзеленыя нядаўна кiтайскiм бокам крэдыты для РБ (на агульную суму больш чым 234 мiльёны долараў ЗША) будуць патрачаны на трэцяга ў нашай рэспублiцы мабiльнага аператара. Плануецца таксама адкрыць фабрыку па вытворчасцi мабiльных тэлефонаў. Ажыццяўленне задуманага стала магчымым дзякуючы заключэнню памiж Кiтаем i Беларуссю больш за 1,5 дзесятка мiждзяржаўных i мiжурадавых пагадненняў i 20 кантрактаў у вынiку нядаўняга вiзiту нашага прэзiдэнта ў КНР.

Развiваюцца i ўзмацняюцца таксама тэхнiчныя i культурныя сувязi. Каля тысячы студэнтаў з «Паднябеснай» набываюць адукацыю ў нашых ВНУ. Падтрымлiваюць кантакты мiж сабою i грамадскiя арганiзацыi абедзвюх рэспублiк. Напрыклад, ветэранскiя. «Месцы захавання савецкiх воiнаў пастаянна даглядае наш маладзёжны саюз»,— заверыў спадар У Хуньбiнь. Летась у склад дэлегацый, запрошаных на мерапрыемствы з нагоды святкавання Перамогi над японскiм фашызмам, уваходзiлi i беларускiя ветэраны.

Кiтайцам даспадобы многiя якасцi беларускага народа. Спадар пасол адзначыў менавiта працавiтасць, цярплiвасць, дыпламатычнасць, памяркоўнасць, разважлiвасць нашых людзей. Усходнi светапогляд лiчыць гэтыя рысы прыступкамi да дасягнення найвышэйшага розуму.