Беларусы сталi жыць лепш, i ўсё больш давяраюць дзяржаўнай уладзе

Источник материала:

Сацыялогiя

Вынiкi сацыялагiчнага манiторынгу паказваюць, што ўсё больш беларусаў адносяць сябе да людзей з сярэднiм дастаткам. Гэту тэндэнцыю можна ўпэўнена назваць устойлiвай. Так, сёння да катэгорыi «з сярэднiм дастаткам» адносяць сябе 69 працэнтаў апытаных, хоць у чацвёртым квартале 2001 года такiх было толькi 35,7 працэнта. У той жа час «беднымi» сябе назвалi 19,6 працэнта беларусаў (у IV квартале 2001 года — 47,5 працэнта).

Колькасць грамадзян, якiя лiчаць, што iх матэрыяльнае становiшча пагоршылася, зменшылася за апошнiя чатыры гады з 44,2 да 12,2 працэнта. За гэты ж час адзначыўся рост колькасцi рэспандэнтаў, перакананых у тым, што сацыяльна-эканамiчная сiтуацыя ў краiне паляпшаецца (з 9,2 да 38,2 працэнта), i тых, хто лiчыць, што сiтуацыя застаецца стабiльнай — з 12,8 да 35,5 працэнта.

Для насельнiцтва Беларусi менш востра стаяць такiя праблемы, як неэфектыўнасць дзяржаўнага кiравання, недастатковая сацыяльная абарона грамадзян, беспрацоўе, карупцыя ў дзяржструктурах. Большы градус набылi праблемы жыллёвая, выхавання моладзi, нiзкага ўзроўню культуры насельнiцтва, эканамiчныя, мiжнародная абстаноўка.

Натуральна, што рост эканамiчнага дабрабыту, сацыяльна-эканамiчная i палiтычная стабiльнасць у грамадстве паўплывалi на ацэнку людзьмi органаў дзяржаўнай улады. Так, у межах 70 працэнтаў рэспандэнтаў станоўча ацанiлi дзейнасць Адмiнiстрацыi Прэзiдэнта, урада i кiраўнiцтва прадпрыемстваў, больш за палову — работу мясцовых органаў улады i мiнiстэрстваў. У той жа час знiзiўся i да таго невысокi рэйтынг даверу да апазiцыйных сiл: да недзяржаўных СМI — з 11,5 да 4,5 працэнта, да свабодных прафсаюзаў — з 9,7 да 4,2 працэнта, да апазiцыйных партый — з 4,1 да 0,6 працэнта.

Закранулi сацыёлагi i тэму маючых адбыцца прэзiдэнцкiх выбараў.

Гэта падзея выклiкае значны iнтарэс у пераважнай большасцi дарослага насельнiцтва Беларусi: выбары «вельмi цiкавяць» 73,1 працэнта рэспандэнтаў (у 2004 годзе — 64,8 працэнта), «не вельмi цiкавяць» — 12,1 працэнта апытаных i «зусiм не цiкавяць» толькi 1,5 працэнта беларусаў.

Для большасцi беларусаў (82,1 працэнта) «мае вялiкае значэнне», хто будзе абраны прэзiдэнтам краiны. Аналагiчна абсалютная большасць насельнiцтва (89,2 працэнта) пераканана, што ўзровень жыцця народа ў значнай ступенi залежыць ад таго, хто з’яўляецца прэзiдэнтам краiны.

У ходзе апытання рэспандэнтам было прапанавана ацанiць дзейнасць дзеючага прэзiдэнта Аляксандра Лукашэнкi. 87,5 працэнта апытаных ацанiлi яе як станоўчую цi хутчэй, станоўчую. На думку 88,3 працэнта рэспандэнтаў, А. Лукашэнка выконвае свае перадвыбарныя абяцаннi.

Згодна з вынiкамi даследавання, калi б выбары прэзiдэнта Беларусi адбылiся сёння, за дзеючага кiраўнiка дзяржавы прагаласавалi б 76,7 працэнта апытаных. Давер iншым прэтэндэнтам на пасаду прэзiдэнта — не больш за 2 працэнты.