Пяць медалёў i нiводнага «золата» пакуль?

Месцы правядзення спаборнiцтваў: Турын (хакей, шорт-трэк, канькабежны спорт i фiгурнае катанне), Пiнерола (керлiнг), Праджэлата (скачкi з трамплiна, лыжныя гонкi i дваябор’е), Сестрыерэ i Сан Секарыо (гарналыжны спорт), Чэзана (бiятлон, бобслей, скелетон, санны спорт), Соз д’Ул (фрыстайл), Барданэкiя (сноуборд).

Агульная колькасць вiдаў праграмы: пятнаццаць. Беларусы ўдзельнiчаюць у сямi з iх: бiятлон, фрыстайл, фiгурнае катанне, шорт-трэк, хуткасны бег на каньках, скачкi на лыжах з трамплiна i лыжныя гонкi.

Першы старт: для прадстаўнiкоў нашай каманды гэта класiчная ў бiятлоне дыстанцыя, якую лiчаць «марафонам на выжыванне». 11 лютага беларускiх страляючых лыжнiкаў чакае iндывiдуальная гонка на дваццаць кiламетраў з чатырма агнявымi рубяжамi.

Падарунак «Белпошты»: да Белай Алiмпiяды ў Турыне была выпушчана серыя марак — «Фрыстайл» i «Сноуборд». Наогул з 1992 года ў абарачэнне ўведзена 61 марка на спартыўную тэму.

Iмянiннiца Алiмпiяды: 25 лютага, у перадапошнi дзень Гульняў, свой 33-i дзень нараджэння святкуе бiятланiстка Алена Зубрылава.

МОДНА, КАМФОРТНА, СIМВАЛIЧНА!

Нашы алiмпiйцы ўпершыню апрануць галаўныя ўборы са шчыпанай норкi, а шарфы для мужчын i жанчын будуць адрознiвацца: у адных сiмвалiзуюць беларускi сцяг, у другiх перадаюць яго арнамент. Дызайнам параднага адзення Гульняў-2006 каля паўгода займалася ўпраўленне бытавога абслугоўвання Упраўлення справамi прэзiдэнта краiны. Паводле слоў галоўнага дызайнера Уладзiмiра Булгакава, кожная распрацоўка формы звязана з модай, якая дастаткова цыклiчна:

— Напрыклад, у Нагана спартсмены былi апрануты ў адзенне вялiкага аб’ёму. Колер формы быў карычневы. У Солт-Лэйк-Сiцi палiто былi зеленаватыя, падоўжаныя, у жанчын з футрам i сiлуэтам па фiгуры, з завышанай талiяй. Галаўныя ўборы мелi казыркi.

— Чаму ў форме зiмовых Гульняў не выкарыстаны халодныя тоны, скажам, сiнi?

— Трэба ўлiчваць, што гэты колер прысутнiчае ў сцягу некаторых краiн — расiян, французаў i г.д. — а мы iмкнёмся выкарыстоўваць тыя адценнi, што звязаны з нашай сiмволiкай цi прыродай краiны. Так, на Алiмпiядзе ў Турыне спартсмены будуць у палiто стрыманых бэжава-пастэльных тонаў: гэта i сусветная тэндэнцыя моды, i лясны матыў Белавежскай пушчы.

— Уладзiмiр Васiльевiч, вы распрацоўваеце параднае аддзенне ўжо для пятай Алiмпiяды. Якiм яно павiнна быць у iдэале?

— Галоўнае, каб форма выглядала святочна, бо Гульнi — самая маштабная спартыўная падзея чатырохгоддзя. Акрамя гэтага, мадэль павiнна падыходзiць людзям рознай камплекцыi, каб яны адчувалi сябе камфортна. Iдэальны варыянт, калi адзенне пры ўсiм гэтым яшчэ i расказвае аб краiне, якую спартсмены прадстаўляюць. Напрыклад, у Афiнах наша форма сiмвалiзавала блакiтныя азёры. Кампазiцыйныя рашэннi розныя, а iдэя адна: прадставiць Беларусь як мага лепш.

АЎТАМАБIЛЬ — КОЖНАМУ МЕДАЛIСТУ

БФСТ «Дынама» сумесна з Мiнскiм транзiтным банкам пры падтрымцы кампанii Volkswagen «азалацiць» нашых медалiстаў XX Зiмовай Алiмпiяды аўтамабiлямi аднайменнай маркi. Залаты лаўрэат атрымае «Фольксаваген Таурэг», сярэбраны — «Фольксваген Пасат», бронзавы медалiст — «Фольксаваген Гольф». Рыначны кошт гэтых аўтамабiляў амаль супадае з тымi прэмiяльнымi, якiя ўстаноўлены дзяржавай за месца на алiмпiйскiм п’едэстале. У залежнасцi ад вартасцi ўзнагароды, ён роўны 60 тысячам, ЗО тысячам i 20 тысячам долараў ЗША адпаведна. Старшыня БФСТ «Дынама» Юрый Бародзiч у прыватнай размове з журналiстам «Звязды» адзначыў, што напачатку была iдэя прэмiраваць аўтамабiлямi толькi спартсменаў-дынамаўцаў, якiя складаюць палову алiмпiйскай зборнай. Потым было вырашана стымуляваць такiм чынам усiх членаў каманды, незалежна ад таго, якому ведамству яны «прыпiсаны». Старшыня праўлення Мiнскага транзiтнага банка, якi ўваходзiць у Мiжнародны холдынг «Атлант-М», Андрэй Жышкевiч паведамiў, што спорт у Беларусi з’яўляецца дзяржаўным прыярытэтам i яго фiнансаванне робiцца ў асноўным з бюджэтных сродкаў. «Мiж тым у суседнiх краiнах спартыўную галiну i алiмпiйскi рух у прыватнасцi ў немалой ступенi спансiруе нацыянальны бiзнэс. Мiнскi транзiтны банк вырашыў пачаць укараненне гэтай традыцыi i ў нашай краiне», — заявiў банкiр.

Алімп-экспрэс

Агонь Алiмпiяды праследуюць няшчасцi: то самалёт з падарункам Праметэя ледзь прызямлiўся (быў атрыманы фальшывы вызаў аб замiнiраваннi аэрапорта), то ў час эстафеты ў горадзе Трэнта людзi ў масках аказалiся хутчэйшымi за чэмпiёнку Iталii ў бегу на 1500 метраў Элеанору Берланду i адабралi ў яе факел, то руху агню да Турына перашкаджаюць выступленнi антыглабалiстаў, якiя такiм чынам пратэстуюць супраць будаўнiцтва чыгункi.

Пад пагрозай аказалася трансляцыя Алiмпiяды: адбылося частковае абрушэнне тэлецэнтра. На шчасце, засталiся без ахвяр, а эфiр наладжаны.

Доўгi час пад сумненнем знаходзiўся бюджэт Гульняў. Першапачаткова ён складаў 1 мiльярд 138 мiльёнаў еўра, аднак потым быў выяўлены дэфiцыт у памеры 41 мiльёна, а напярэдаднi Алiмпiяды ён наблiзiўся да 80 мiльёнаў. Выйсце арганiзатары знайшлi ў знiжэннi расходаў на рэкламу i правядзеннi спецыяльнай латарэi.

Новыя квалiфiкацыйныя нарматавы, уведзеныя Мiжнародным саюзам канькабежцаў, скарацiлi на Гульнях колькасць фрыстайлiстаў. Францыя i Бельгiя наогул засталiся без спартсменаў у хуткасным бегу на каньках. Беларусь прадставiць толькi Святлана Радкевiч.

У Турыне выдзелена 35 спецыяльных палос для транспарту, што абслугоўвае Гульнi: iх асаблiвасць — жоўтая разметка з алiмпiйскай эмблемай (гэта пяць кольцаў). Новаўвядзенне выклiкала заторы на дарогах i пратэсты вадзiцеляў звычайных машын яшчэ да з’яўлення ўдзельнiкаў Гульняў. Такая рэакцыя зразумелая: iнтэнсiўнасць руху, паводле падлiкаў дарожнай палiцыi, складзе 2800 аўто ў гадзiну ў параўнаннi з ранейшымi 1800, а за парушэнне разметкi без спецыяльнага на тое дазволу трэба будзе заплацiць да 150 еўра. Асаблiва напружаная сiтуацыя складваецца на аўтастрадзе Турын—Мiлан: яна з’яўляецца платнай, але вадзiцелi не жадаюць аддаваць грошы, бо з-за дарожных работ машыны рухаюцца вельмi марудна, з хуткасцю 30—40 кiламетраў у гадзiну.

Самым дарагiм аб’ектам алiмпiйскай сталiцы-2006 стала метро, сусветны рэкардсмен па ўзроўню аўтаматызацыi i камп’ютарнага забеспячэння (цягнiкi рухаюцца без машынiстаў). Праект з’яўлення ў Турыне падземкi абмяркоўваўся яшчэ ў 30-я гады мiнулага стагоддзя, у 60-я iнжынерна-канструктарскае бюро аўтазавода ФIАТ распрацавала план яе будовы. Аднак фiнансавыя сродкi з’явiлiся толькi дзякуючы правядзенню Белай Алiмпiяды. Турын стаў чацвёртым iтальянскiм горадам пасля Рыма, Мiлана i Неапаля, дзе ёсць метро.