«Лiчу спорт творчасцю...»

Источник материала:

А на мой погляд...

10 лютага ў Турыне пачынаюцца зiмовыя Алiмпiйскiя гульнi. Цi будуць жыхары нашай краiны сачыць за тэлетрансляцыяй падзей Алiмпiяды? Спаборнiцтвамi ў якiх вiдах спорту яны будуць больш цiкавiцца? Падабаюцца iм больш зiмовыя або летнiя Алiмпiяды? Цi абмяжоўваецца iх цiкавасць да спорту праглядам тэлетрансляцый спаборнiцтваў?.. Пра гэта карэспандэнт «Звязды» цiкавiўся ў сваiх суразмоўцаў.

Аляксандр КАРНЮШКIН, начальнiк аддзела iдэалагiчнай працы Нясвiжскага райвыканкама:

— Мне больш падабаюцца летнiя вiды спорту. Але зiмовую Алiмпiяду буду глядзець. I перавагу буду аддаваць лыжным спаборнiцтвам... У мяне ёсць спадарожнiкавая антэна i я пастаянна гляджу спартыўныя трансляцыi. Я «хварэю» за нашых спартсменаў i заўсёды вельмi прыемна, калi пасля перамог падымаецца сцяг Беларусi, выконваецца гiмн. Глядзiш гэта па тэлевiзары i адчуваеш гонар за краiну, за сваiх людзей...

Што датычыцца заняткаў спортам, то ў гэтай справе я не надзвычай актыўны. Але, напрыклад, 12 лютага будзе праходзiць спартакiяда сярод кiруючых работнiкаў раёна па лыжных гонках, i я збiраюся прыняць у ёй удзел. Таксама люблю пагуляць у валейбол, у футбол. I пастаянна займаюся такiм «сядзячым» вiдам спорту, як шахматы. Дома з сынам гуляю...

Андрэй ТУР, намеснiк мiнiстра эканомiкi Беларусi:

— Алiмпiяду я буду глядзець. А перавагу буду аддаваць бiятлону, хакею. Апошнiм часам таксама люблю глядзець фрыстайл i канькабежныя гонкi.

Спорт займае ў маiм жыццi большае месца, чым прагляд трансляцый па тэлевiзары. Гадоў з трынаццацi я пачаў гуляць у футбол i працягваю гуляць зараз (раз на тыдзень). Таксама апошнiя паўтара года прыкладна раз на тыдзень гуляю ў вялiкi тэнiс.

Дзянiс БАРТОШ, начальнiк аддзела па мiжнародных сувязях i рабоце са СМI Камiтэта дзяржаўнага кантролю Беларусi:

— Алiмпiяду ў Турыне я буду глядзець. Што датычыцца сiмпатый, то сярод усiх iншых зiмовых вiдаў спорту я аддаю перавагу хакею. Трансляцый хакейных спаборнiцтваў буду iмкнуцца паглядзець як мага больш, бо люблю хакей. Таксама буду глядзець бiятлон, буду «хварэць» за беларускую каманду...

Што да пытання аб тым, якой Алiмпiядзе я аддаю перавагу, то, хутчэй, зiмовай. Бо зiмовыя гульнявыя вiды спорту мне больш падабаюцца. Хакей я больш люблю, чым футбол.

Леанiд ЛЕВIН, беларускi архiтэктар, лаўрэат Ленiнскай прэмii:

— Я не скажу, што не магу жыць без спорту. Але пэўная цiкавасць да спартыўных трансляцый у мяне ёсць. I я буду глядзець Алiмпiяду. Мне цiкава паглядзець, што новага з’яўляецца ў спаборнiцтвах. Бо я лiчу спорт творчасцю. А да творчасцi я маю непасрэдныя адносiны...

Напэўна, да хакея засталася большая цiкавасць з юнацтва. Таксама цiкава паглядзець на фiгурнае катанне, бо прыгожы вiд спорту. Цiкава паглядзець бiятлон... Аднак люблю я больш летнюю Алiмпiяду. Чаму? Цяжка сказаць, я раней не задумваўся над гэтым пытаннем... У дзяцiнстве мне здавалася, што летняя Алiмпiяда — больш «сур’ёзная», чым зiмовая. Зараз я разумею, што гэта не так, але раней такое пачуццё было.

У iнстытуце я займаўся лёгкай атлетыкай, а таксама альпiнiзмам (мы трэнiравалiся ў Беларусi, але за яе межы не выязджалi).

Васiль ХРОЛ, намеснiк старшынi Камiсii па бюджэту, фiнансах i падатковай палiтыцы Палаты прадстаўнiкоў:

— Сярод зiмовых вiдаў спорту мае самыя любiмыя — бiятлон i лыжныя гонкi. Бо гэта вельмi экстрэмальныя i захапляльныя вiды спорту. Магчыма, таксама таму, што я заўсёды спадзяюся, што беларуская зборная стане алiмпiйскiм чэмпiёнам (асаблiва ў эстафеце). Чакаю i не магу дачакацца гэтага... Аднак перавагу я ўсё ж аддаю летняй Алiмпiядзе. Бо летнiя вiды спорту мне блiжэй.

Сам я люблю крыху пакатацца на лыжах. Летась навучыўся катацца на горных лыжах пасля таго, як пабудавалi гарналыжныя комплексы ў Сiлiчах i ў Лагойску. Люблю яшчэ плаванне... А ў маладосцi, калi быў студэнтам, я захапляўся боксам. I ў мяне быў першы разрад па боксу.