Дасягнуць вышынi «Гефеста»

Источник материала:

Выбiрай беларускае!

За апошнiя пяць гадоў прадпрыемства накiравала звыш 45 мiльёнаў долараў уласных сродкаў на закупку навейшых тэхналогiй i абсталявання. Завод асвоiў выпуск практычна ўсяго шэрага стацыянарных газавых, электрычных i камбiнаваных плiт — 12 мадэляў i 66 мадыфiкацый, стварыў гаму настольных плiт з духоўкай, падрыхтаваў вытворчасць турыстычнай плiты i пачаў вытворчасць убудаваных сталоў: газавых эмалiраваных, нержавеючых, з эмаллю «антрацыт», газавых сталоў са шкляной паверхняй, электрычных i шклокерамiчных, у тым лiку з сэнсорным кiраваннем, якiя па сваёй якасцi i дызайну не саступаюць iмпартным.

Вырабы пад гандлёвай маркай «Гефест» канкурыруюць з больш як дваццаццю фiрмамi, прадукцыя якiх прадстаўлена пад гандлёвымi маркамi «Арыстон», «Iндэзiт», «Сiменс» i iншымi. Брэсцкiя газавыя i электрычныя плiты iстотна перасягаюць аналагiчныя вырабы заводаў СНД па тэхнiчных характарыстыках, а па экалагiчных параметрах не саступаюць плiтам падобнага класа заходняй вытворчасцi.

Прадпрыемства рэалiзуе сваю прадукцыю практычна ва ўсе краiны СНД i Прыбалтыку. У многiх з гэтых краiн i iншых таксама выпускаюцца плiты, аднак «Гефест» на такiм цесным рынку выйграе за кошт захавання высокай якасцi i стабiльнага кошту, рост якога ўдаецца стрымлiваць дзякуючы пошуку недарагой сыравiны i камплектуючых, выкарыстанню ўласных камплектуючых, i, акрамя гэтага, за кошт паступовага знiжэння рэнтабельнасцi. Апошняя ў 2005 годзе склала 19 працэнтаў, што нiжэй, чым некалькi гадоў таму.

Не больш за 15 працэнтаў гатовых вырабаў паступае на айчынны рынак па квотах Мiнiстэрства гандлю Рэспублiкi Беларусь для рэалiзацыi цераз рознiчную гандлёвую сетку, а таксама адпраўляецца на забеспячэнне замены плiт падчас капiтальных рамонтаў. Вядома, дарэчы, што тэрмiн службы такога бытавога прыбора, як плiта, разлiчаны на 15 гадоў. У 2004 годзе замене належалi прыкладна 800 тысяч плiт, аднак недахоп дзяржаўных датацый не дазволiў ажыццявiць належнае ў патрэбным аб’ёме.

Паводле слоў генеральнага дырэктара СП ААТ «Брэстгазаапарат» Мiхаiла Iофе, на ўнутраным рынку адчуваецца недахоп брэсцкiх апаратаў, аднак «абавязкi» экспартаарыентаванага прадпрыемства дазваляюць пакiнуць беларускаму гандлю i новабудоўлям каля 60—65 тысяч плiт у год.

Даччынае прадпрыемства УПП «Гефест-Кварц» пяць гадоў як вырабляе высакаякаснае дэкарыраванае шкло, якое раней закуплялася для брэсцкiх апаратаў ў Польшчы, Германii i Расii. Дарэчы, завод першым у Беларусi асвоiў выпуск загартаванага шкла, адзiн квадратны метр якога вытрымлiвае награванне да 300 градусаў. Такое шкло з`яўляецца i цалкам бяспечным для выкарыстання, паколькi ў выпадку пашкоджання рассыпаецца на безлiч дробных, не здольных паранiць, кавалкаў.

Практычна завершаны работы па стварэнню новага УП «Гефест-Тэхнiка» — сучаснага завода, аснашчанага унiверсальным комплексам высокавытворчага, аўтаматызаванага абсталявання i тэхналогiяй, якая дазваляе выпускаць якасную прадукцыю па ўсёй наменклатуры вырабаў. Гэты праект стварыў 500 новых працоўных месцаў i павялiчыў аб`ём гадавога выпуску на 20 мiльёнаў долараў.

г. Брэст.