Ахова ўмее лавiць злачынцаў...

Источник материала:

Сур’ёзны экзамен для асабовага складу аддзялення заўсёды — падвядзенне вынiкаў работы за мiнулы год. Такi экзамен супрацоўнiкi Ашмянскага аддзялення аховы мiлiцыянер узводу мiлiцыi прапаршчык Валерый Федаровiч i мiлiцыянер-вадзiцель узводу мiлiцыi старшына Аляксандр Масевiч вытрымалi дастойна — прызнаны лепшымi супрацоўнiкамi аддзялення.

На рахунку асабовага складу — 54 затрыманнi за ўчыненне адмiнiстрацыйных правапарушэнняў, супрацоўнiкамi асабiста раскрыта 7 i яны прынялi ўдзел у раскрыццi 10 злачынстваў.

... Грамадзянiн Я. прыехаў у Ашмяны праводзiць сябра ў армiю. Ужо i прызыўнiкi паехалi, але душа патрабавала прадаўжэння «свята». Каля ваенкамата ён хуценька знайшоў сябру замену — завёў сабе новага таварыша. Натуральна, ад прапановы выпiць той не адмовiўся. Набыўшы спiртное i распiўшы яго ў кватэры аднаго з блiжэйшых дамоў, ашмянец успомнiў, што яму на рабоце неабходна атрымаць аванс. Хуценька злётаўшы за новай наяўнасцю, яе гаспадар вырашыў шчодра адзначыць прыбаўленне грашовых купюр чарговай партыяй спiртнога. Аднак i яно праз некаторы час скончылася. Даючы зразумець новаму сябру, што час ужо i заканчваць, шчодры «спонсар» прапанаваў правесцi яго дадому, абяцаючы па дарозе пачаставаць яшчэ i пiвам. Аднак новаму таварышу так спадабалася адпачываць за чужы кошт, што той стаў патрабаваць у свайго знаёмага грошай на спiртное. А калi «сябар» адмовiўся, то некалькi разоў ударыў яго, а затым забраў грошы i ўцёк.

Толькi дзякуючы своечасоваму звароту пацярпеўшага ў РАУС, граматным i прафесiйным дзеянням нарада Ашмянскага аддзялення аховы ў складзе прапаршчыка мiлiцыi Валерыя Федаровiча i старшыны мiлiцыi Аляксандра Масевiча злачынца быў затрыманы па «гарачых слядах», хоць i гэта не прайшло без эксцэсу: аматара халявы мiлiцыянеры аховы практычна злавiлi на падаконнiку раскрытага насцеж акна, калi той вырашыў такiм экстравагантным чынам уцячы ад правасуддзя.