Беларусы «качаюць правы»

Источник материала:

Па заведзенай яшчэ ў савецкiя часы звычцы многiя нашы суграмадзяне шукаюць справядлiвасцi не ў судзе, а пiшуць скаргi ў пракуратуру i ў iншыя iнстанцыi. З аднаго боку, гэта сведчыць пра тое, што «прававая непiсьменнасць» беларусаў яшчэ не лiквiдаваная i працы ў гэтым накiрунку непачаты край. Разам з тым, калi людзi звяртаюцца ў тую цi iншую ўстанову, значыць яны вераць, што iх праблемы будуць вырашаны. I пракуроры iмкнуцца апраўдаць гэты давер. Нядаўна адбылася калегiя рэспублiканскай Пракуратуры, на якой разглядалiся пытаннi паляпшэння эфектыўнасцi працы па выкананню заканадаўства аб зваротах грамадзян.

Як адзначыў Генеральны пракурор Беларусi Пётр Мiклашэвiч, апошнiм часам давер насельнiцтва да органаў пракуратуры ўзрос. Летась пракуроры атрымалi каля 63 тысяч заяў i скаргаў. Не ўсе яны аказалiся ў кампетэнцыi пракуратуры, рашэннi былi прыняты больш чым па 42 тысячах зваротах, з якiх кожнае пятае прызнана абгрунтаваным. Паводле слоў кiраўнiка Пракуратуры, павялiчылася «плынь» скаргаў на работнiкаў жыллёва-камунальнай i сацыяльнай сфер, а таксама на чыноўнiкаў, якiя парушылi працоўнае заканадаўства. Так, пракуроры сумесна з кантралёрамi выявiлi шэраг фактаў неабгрунтаванага павышэння цэн на камунальныя паслугi.

Увогуле, менталiтэт айчынных чыноўнiкаў мяняецца не так хутка, як хацелася б. Нярэдка людскiя звароты дзяржаўныя ўстановы пакiдаюць без адказу або даюць фармальныя тлумачэннi. Утвараецца кругаварот скаргаў у дзяржаўных установах, а праблемы «маленькага чалавека» не вырашаюцца. У мэтах выкаранення цяганiны пракуроры сталi часцей выязджаць у працоўныя калектывы для разгляду скаргаў непасрэдна на месцах. Па актах пракурорскага рэагавання да адмiнiстрацыйнай i дысцыплiнарнай адказнасцi прыцягнуты больш за 700 службовых асоб.

Пётр Мiклашэвiч запэўнiў, што пракуроры не дзеляць скаргi грамадзян па ступенi iх значнасцi, бо добра разумеюць: для грамадзянiна, якi звяртаецца ў дзяржаўную ўстанову па самаму, здавалася б, дробязнаму пытанню, менавiта яго праблема — найважнейшая.